Me rastin e festave, shef Mondi na propozon një ëmbëlsirë tejet të shijshme, atë të dy petkave me krem, njohur ndryshe edhe si “sporcamuss” pugliesi.
Kjo ëmbëlsirë, na thotë shef Mondi, është ajo që kemi shijuar që fëmijë në pastiçeritë e Tiranës para viteve 1990, e që e quanim edhe“pasta me dy petë”: dy petë të holla kërce, që mbajnë me kujdes mes tyre, kremin diplomat.
Për tërë nostalgjikët dhe ata që duan ëmbëlsirat me peta, sa më poshtë, receta.
Përbërësit për 6 ose 24 copë
Një petë sfogliat 230 gramshe (drejtkëndëshe, 22 cm x 33 cm),
Qumësht, 250 ml,
Të verdha vezësh 3,
Sheqer 75 gram,
Miell 25 gram,
Vanilje sipas dëshirës,
Krem qumeshti i ëmbël (pana) 180 ml
Sheqer pluhur, 20 gram,
Sheqër pluhur për të spërkatur petën e sipërme, sipas dëshirës
Përgatisim fillimisht kremin e pastiçerisë, si bazë e kremit diplomat.
Në një tenxhere, vendosim qumështin në zjarr që të nxehet, por jo të vlojë, me vaniljen, dhe, nëse dëshironi, edhe lëkurë limoni. Ndërkohë, në një tas hedhim të verdhat e vezëve dhe sheqerin, e i përziejmë mirë derisa të tretet sheqeri. Shtojmë miellin dhe vazhdojmë përzierien, derisa të krijohet një mase homogjene.
Heqim qumështin e nxehtë nga zjarri dhe e shtojmë tek masa e përgatitur me vezët, sheqerin e miellin, duke e hedhur në forme currili dhe përzjerë vazhdimisht, derisa të gjithë përbërësit të unifikohen. Masën e përgatitur e hedhim në tenxheren e qumështit dhe e vendosim të vloje në zjarr mesatar, duke e përzjerë pa nderprerje, derisa kremi të lidhet mirë. E heqim tenxheren nga zjarri dhe e kalojme kremin në një tas, që të ftohet, duke e mbuluar me qese kuzhine.
Përgatisim kremin ”chantily”, duke rrahur kremin e qumështit (duhet të jetë shumë i ftohtë) me një rrahës elektrik, derisa të lidhet mirë si shkumë e trashë. I sshtojmë sheqerin pluhur me sitë, dhe i përziejme mirë me ndihmen një spatule silikoni, derisa të unifikohen mirë.
Kur kremi i pastiçerisë të jetë ftohur plotesisht, e bashkojmë me kremin chantily, duke i përzjerë me rrahësen prej teli, derisa të krijohet një krem i butë dhe homogjen. E vendosim në frigorifer.
Përgatisim bazat me petën sfoliatë, e cila duhet të ketë shkrirë plotësisht. E presim në 6 ose 24 katrorë me ndihmën e një thike, të cilët i vendosim në tepsi ku me parë kemi shtruar një letër kuzhine, rreth 1 cm nga njëri-tjetri. I lyejmë me pak qumësht, dhe i kalojmë në furrë të paranxehur ne temperaturën 180° statike (pa ventilim), për rreth 15 deri 20 minuta, ose derisa të marrin ngjyrë të kuqërremtë sipër.
I heqim nga furra dhe i lëmë të ftohen plotësisht. Me ndihmën e një thike, i ndajmë bazat e pjekura në dy peta, duke krijuar kështu bazën që do ta mbushim më pas me kremin diplomat dhe pjesën e sipërme, me të cilën do ta mbulojmë.
Pasi t’i kemi mbushur të gjitha, i kalojmë në furrë statike në temperaturën 90° për 5 minuta.
I nxjerrim nga furra, i spërkasim me sheqer pluhur dhe i shërbejmë.
