Makaronat që do t’ju propozohen sot, mbajnë emrin e Shef Mondit, Armand, dhe janë një recetë vërtetë speciale, për këdo që do të bëjë një pjatë të shpejtë makaronash, me tejet shije.
Ja cilët janë përbërësit:
Për 4 persona
Makarona Strozzapreti, 320 gr
Proshutë krudo, 180 gr
Domate qershizë të freskëta, 500 gr
Majdanoz, 2 tufa të grira
Verë e bardhë, ½ gotë
Vaj ulliri,
Spec djegës,
Hudhra, 1 thelp
Hedhim në një tigan vajin dhe hudhrën e prerë në copa të vogla, dhe e lëmë të marrë ngjyrë të artë.
Pasi hudhra të zverdhet, e heqim, shtojmë specin djegës të coptuar, proshutën krudo të prerë në kubikë të vegjël dhe gjysmën e majdanozit të grirë. I përziejmë për rreth 2 min në zjarr të fortë, e më pas e shuajmë me verën e bardhë, të cilën e lëmë të avullojë për rreth 2 minuta.
Ndërkohë vëmë tenxheren me ujë në zjarr. Pasi uji të marrë valë, e rregullojmë me kripë, dhe hedhim makaronat, duke u kujdesur t’i përziejmë që të mos ngjiten.
Presim domatet në kubikë të vegjël dhe i hedhim mbi salcën që po përgatitet.
Që zierja e domateve të jetë më e shpejtë dhe të bëhet më mirë, shtojmë 5 lugë gjelle nga uji i makaronave që po ziejnë.
Kullojmë makaronat dhe i hedhim në tiganin ku kemi salcën. Shtojmë majdanozin e mbetur dhe i trazojmë mirë, derisa salca dhe makaronat të përzien mirë.
I shërbejmë të ngrohta.
Sugjerim: Kjo recetë eshtë mirë të mos shoqërohet me djathë të grirë, pasi i mbulohen shijet dhe aromat. Nëse ju pëlqen me djathë të grirë, është mirë të përdorni Parmixhano Regiano, një lugë gjelle për racion.