Me futjen e stinës së dimrit, kolla dhe dhimbjet e fytit janë pothuajse të pashmangshme. Por në vend që të konsumoni litra (dhe para’) në shurupe jo dhe aq bio e me shumë sheqer, mund të zgjidhni një qetësues të vërtetë përbërë prej kurkumës (shafranit të Indisë) dhe mjaltit, të cilit ndonjëherë mund t’i shtoni edhe pak xhenxhefil.
Krem me shafran të Indisë dhe mjaltë
Shafrani i Indisë dhe mjalti janë dy përbërës që gjenden lehtësisht. Ata kanë veti të dobishme për shëndetin, veçanërisht gjatë stinës së dimrit. Kremi me shafran i Indisë dhe mjaltë, i quajtur edhe mjalti i artë, është një antibiotik i fuqishëm 100% natyral, shumë i lehtë për t’u përgatitur. Ndryshe nga antibiotikët sintetikë, ky krem nuk ka efekte anësore në florën bakteriale të zorrëve. Përveçse një antibiotik efektiv, kurkuma dhe mjalti janë të përshtatshme për të luftuar kollën e ftohjen, e po ashtu edhe për zgjidhjen e problemeve me tretjen.
Përfitimet
Shafrani i Indisë përdoret gjerësisht, si në gatim ashtu edhe në kujdesin personal. Është një anti-inflamator i fuqishëm, me veti antioksiduese, që e bëjnë atë një ilaç të shkëlqyer për të luftuar radikalet e lira dhe për të ngadalësuar plakjen qelizore. Shafrani i Indisë është gjithashtu një substancë neuroprotektive, e aftë për të parandaluar disa patologji degjenerative si sëmundja e Alzheimerit dhe ka një aktivitet të dukshëm antibakterial dhe pastrues, i cili lehtëson tretjen. Kurkumin, një nga substancat që ndodhet kryesisht tek kurkuma (shafrani i Indisë), është gjithashtu një imunostimulant i fuqishëm dhe ndihmon në forcimin e imunitetit. Veprimi i mjaltit njihet prej dekadash dhe për këtë arsye përdoret për të ftohtin dhe kollën. Por mjalti ka edhe veti antibiotike, antibakteriale dhe antianemike, është diuretik e mbron sistemin tretës.
Shafran i Indisë dhe mjalti: receta
Nuk ka asgjë më të lehtë se përgatitja e kësaj recete në shtëpi! Thjesht përzieni 100 gram mjaltë organik (sigurohuni që të jetë pa sheqer të shtuar) dhe 10 gram pluhur kurkume në një kavanoz qelqi, derisa masa të jetë përzierë mirë. Të gjitha llojet e mjaltit janë të mirë: mjalti i bredhit për të ftohtin dhe sinusitin, mjalti i portokallit për kollën e thatë, mjalti i lulediellit për temperaturën dhe gripin, mjalti i trumzës si antiseptik dhe antifebril. Kremi i shafranit të Indisë dhe mjaltit mund të ruhet në një kavanoz të mbyllur në një vend të freskët për rreth 5 ditë. Në të kundërt, mund të përgatisni sasi më të vogla.
Si ta merrni masën e përgatitur
Masa e përgatitur mund të merret si ilaç parandalues, një lugë çaji një herë në ditë. Në rast kolle dhe dhimbje fytit, ja cilat janë dozat e rekomanduara: ditën e parë merrni një lugë çaji çdo orë, ditën e dytë çdo dy orë dhe ditën e tretë çdo tre. Si një suplement natyral dhe restaurues, më në fund mund të merrni një lugë çaji tri herë në ditë, pas vakteve kryesore. Mund ta hani direkt ose ta tresni në çajëra.
Çfarë mund t’i shtoni: xhenxhefil, kanellë dhe limon
Kanella, xhenxhefili dhe limoni janë disa prej përbërësve që mund t’i shtohen shafranit të Indisë dhe mjaltit për të rritur veprimin antibiotik. Kanella forcon përfitimet dhe lehtësimin për fytin; xhenxhefili (një lugë çaji) është mrekulli për problemet e tretjes, ose disa pika limoni që rrisin fuqinë antiseptike dhe forcon sistemin imunitar.
Efektet anësore
Ashtu si me të gjitha gjërat që merren dhe bëhen në shtëpi, duhet t’u kushtoni vëmendje dozave dhe kundërindikacioneve. Shafrani i Indisë nuk rekomandohet për ata që vuajnë nga gurët në tëmth, sëmundjet e mëlçisë dhe problemet që lidhen me koagulimin e gjakut. Masa përmban gjithashtu më pak sheqer se shurupet e disponueshme në treg, por gjithësesi mjalti nuk rekomandohet për ata që vuajnë nga diabeti ose që duhet të ndjekin dieta të veçanta. Në përgjithësi, si gjithmonë, por edhe më shumë nëse keni patologji të veçanta apo jeni duke marrë medikamente të caktuara, është mirë të konsultoheni me mjekun tuaj për çdo rrezik apo problem.