Nga epoka kur njerëzit flisnin për ide, shkencë, letërsi, sot kemi arritur në epokën e lavdishme të rrjeteve sociale, ku Homo Sapiens ka pësuar një mutacion të pazakontë duke evoluar në Homo Blegerimus.
Kjo specie e re ka disa karakteristika të dallueshme: reflekset e pavullnetshme për të thënë “Bravo!”, urrejtjen patologjike ndaj çdo mendimi ndryshe dhe bindjen e palëkundur se lideri i tyre është më i mençuri. Janë delet e çobanit të radhës, të mbledhur në një ritual të përjetshëm blegerimash.
Si dallohet një “Blegerimus”
- Gramatika?
Janë përdhunues serial të gramatikës se gjuhës shqipe. Nëse një koment përmban më shumë gabime se një tekst i Google Translate nga anglishtja në shqip dhe prapë në kinezçen e lashtë, urime! E ke gjetur një Blegerimus autentik. - Analiza? Meazallah
Për Blegerimus-in mesatar, çdo gjë është e bardhë ose e zezë, hero apo tradhtar, patriot ose i shitur. Argumenti “ndoshta gjërat janë më komplekse” nuk hyn në tru, sepse truri është zëvendësuar me një kapsulë propagande të programuar për të reaguar vetëm ndaj fjalëve kyçe si “lider”, “madhështor”. - Foto duke ngrënë.
Asgjë nuk i përfaqëson më mirë këta komentues sesa një biftek i djegur, një pjatë me mish të rraskapitur dhe një sallatë gjysmë e vyshkur, e shoqëruar me një gotë vere që ka parë ditë më të mira. Ky është arti i tyre i lartë, trashëgimia që do u lënë brezave që vijnë pas. - Ofendimi, arma e vetme
Sapo një mendim ndryshe del në skenë, reagimi është i menjëhershëm:
“Shpellar!”
“I shitur!”
“Pastro gojën kur flet për liderin!”
“Ti je rrogtar i..!”
“Mjeran!”
Si të sillesh me Blegerimus-in?
Nëse rastësisht gjendeni në një “diskutim” me një Blegerimus, duhet të ruash shëndetin mendor:
- Mos përdor logjikën!
Logjika është armiku kryesor i këtij lloji. Nëse provoni t’i shpjegoni diçka me fakte dhe argumente, do të shikoni një reagim të pazakontë: “Po kush je ti, more?” - Jini indiferente.
Nuk ka armë më të fuqishme se mosreagimi. Blegerimus-i lulëzon në kaos, ofendime dhe sharje. Nëse nuk i përgjigjeni, ai do të shqetësohet dhe do të fillojë të sulmojë ndonjë tjetër. - Tallu sa të mundesh
Nëse një komentues thotë “Lideri ynë është më i miri në botë!”, përgjigje “Po, me siguri NASA është duke e studiuar si fenomen natyror.”
Nëse doni të shihni një Blegerimus në krizë ekzistenciale, shkruaji:
“mendoj vertet se postimet e tua duhen lexuar nga të gjithë !”
“Besnikëria jote ndaj liderit dhe partisë është frymëzim për ne të gjithë!”
“Të lutem, më mëso si të mendoj si ju!”
Pas kësaj: ose do t’ju marrin seriozisht , ose nëse jeni me fat do t’ju bëjnë bllok.
Nobel për trushpëlarje
Në fund të fundit, ne nuk mund ta ndalojmë këtë evolucion të tmerrshëm të shoqërisë moderne. Blegerimus-ët do të vazhdojnë të bërtasin, të komentojnë, të ofendojnë, të duartrokasin dhe të postojnë pjatat e tyre në Instagram.
Po ne?
Ne do të vazhdojmë të përpiqemi të ruajmë shëndetin mendor duke i shmangur.
Por pyetja finale në prag të zgjedhjeve mbetet pa përgjigje:
Në një botë ku Blegerimus-ët janë shumicë, kush ka të drejtën të vendosë fatin e të tjerëve?
Mos vallë jemi ne gabim?
Sidoqoftë duhet t’i jemi mirënjohës facebook-ut sepse falë tij po marrim vesh numrin e idioteve, injorantëve, trushplarëve, teveqeleve, dallkaukëve, tyryfylëve…
Na mbetet të ngushëllohemi me Churchill që thoshte: 9 budallenj vlejnë më shumë se 1 i mençur”