Kancelari gjerman ka ripohuar unitetin evropian mbi negociatat tregtare dhe ka bërê thirrje për më shumë presion mbi Moskën.
Linja e përbashkët: “I thashë qartë Trumpit, në takimin tonë personal, se Spanja është anëtare e BE-së dhe se do të negociojmë për tarifat me SHBA-në, ose të gjithë së bashku ose aspak. Nuk ka asnjë mënyrë për ta trajtuar Spanjën keq. Do të arrijmë një rezultat së bashku dhe kjo do të vlejë edhe për Spanjën.” Kancelari shpjegoi se nuk donte të nxiste polemika publike gjatë takimit në Zyrën Ovale. “Nuk doja ta thelloja e as ta përkeqësoja diskutimin në publik,” shtoi ai.
Presion mbi Moskën: Lufta në Ukrainë ishte gjithashtu në fokus të diskutimeve. Merz foli për shifra dramatike. “Numri i të vdekurve dhe të plagosurve në Ukrainë është rritur në një milion. Kjo luftë duhet të mbarojë dhe një herë e përgjithmonë.” Udhëheqësi gjerman theksoi nevojën për një linjë më të ashpër kundër Kremlinit. “Unë kam folur në favor të rritjes së presionit mbi Rusinë,” tha ai.
Roli Evropian. Lidhur me negociatat e ardhshme për Kievin, Merz ishte i qartë. “Ne duam të gjejmë zgjidhje, por zgjidhje që përfshijnë evropianët. Ne nuk jemi të gatshëm të pranojmë një marrëveshje arritur mbi kokat tona.” Ai sqaroi më pas se vendosja e mundshme e ushtarëve gjermanë nuk është në diskutim. Çështja e një kontingjenti në Ukrainë “nuk është aktualisht në tryezë”.
Angazhimi në NATO. Presidenti amerikan e siguroi atë për praninë ushtarake amerikane në Gjermani. Trump, raportoi Merz, “më siguroi përsëri se SHBA-të do të ruajnë praninë e tyre ushtarake në Gjermani”. Kancelari përsëriti angazhimin e tyre të përbashkët ndaj Aleancës Atlantike. “Ne të gjithë jemi të përkushtuar për të arritur objektivin prej pesë përqind për NATO-n”, theksoi ai, duke vënë në dukje se Trump “e pranoi që qeveria gjermane ka marrë një rol udhëheqës në forcimin e shtyllës evropiane të NATO-s”.
