Si një vakt i shijshëm dhe tejet i thjeshtë për t’u përgatitur, MetropolPost ju propozon sot kaneloni me rikota, gorgonxola dhe arra. Edhe pse në traditën italiane kanelonët janë gatim kryesisht i ditës së dielë, ne mund t’i shijojmë ata çdo ditë, e padyshim me mbushje nga më të ndryshmet.
Për të përgatitur kaneloni me rikota, gorgonxola dhe arra, nevojiten:
- 500 gramë rikota e freskët
- 300 gram gorgonzola
- 80 gram arra të thërrmuara
- Kripë e piper sipas dëshirës
- 1 degë majdanozi e prerë,
- Gjalpë
- 250 gram panë guzhine
- 50 gram djath i grirë
- 12 fletë lazanje të holla
Si fillim përzieni rikotën me gorgonxolën e prerë në kubikë të vegjël, 50 gramshin e arrave të thërrmuara, djathin e grirë, kripën, piperin dhe majdanozin e prerë hollë. Kur përzierja të bëhet kremoze, lëreni të pushojë dy orë në frigorifer.
Zbusni më pas në ujë të ngrohtë e të kripur petët e holla të lazanjës, shtrijini mbi një pecetë të pastër dhe lërini të kullojnë për pak. Pastaj vëruni nga dy lugë mbushje në çdo petë, mbështillini rrotull dhe krijoni kanelonët.
Vendosini në një tavë lyer me gjalpë e pak pana kuzhine, lyejini përsipër po me pana, hidhuni sipër panës djathin e grirë e nja dy copëza gjalpi, edhe arrat e mbetura po ashtu.
Piqini në furrë me 200 gradë, përreth 20 minuta dhe…
Ju bëfshin mirë!
