Për 6 deri 8 persona
- Proshutë e pjekur e prerë, 100 gr
- Gjizë pa kripë ose rikota, 100 gr
- Ullinj pa farë, të prerë, 15 gr
- Pesto borziloku, 20 gr
- E verdha e një veze
- Djathë skamorca i tymosur, i grirë, 50 gr
- Pete sfoliatë, 1 copë
Për të përgatitur këtë antipastë të bukur dhe të shijshme, hapim në tryezë petën sfoliatë, të cilën e kemi lënë të shkrijë plotësisht (që të mos ngjitet, shtrojmë pak miell poshtë saj).
Duke u barazlarguar nga të katër anët, shënojmë lehtë (pa e prerë petën), një trekëndësh me bazë 15 cm dhe lartësi 24 cm.
Përgatisim mbushjen, duke përzierë së bashku të gjithë përbërësit, gjizën, proshutën e prerë imët ose me kuba të vegjël, ullinjtë dhe peston, të cilën e shtrojmë brenda trekëndëshit të shënuar në fillim.
I shtojmë sipër skamorcën, të cilën mund ta zëvendësojmë edhe me djath kackavall të butë lope.
Duke filluar nga kulmi i trekëndëshit, në drejtim të anëve të petës sfoliatë, presim me 9 rripa në drejtim të bazës së trekëndeshit nga secila anë, duke lënë bazën me të trashë për të mbyllur pjesën e trungut të pemës.
E mbyllim pemën duke ndërthurur një rrip nga e majta, një nga e djatha, e duke i mbivendosur të gjithë rripat.
Mbushim edhe pjesën e trungut me pak pesto, proshutë dhe skamorca. I palosim të dyja anët e trungut njëra mbi tjetrën dhe e mbyllim bazën me pirun, që të mos dalë mbushja.
Rrahim të verdhën e vezës dhe me të lyejmë pemën tonë.
Për dekor mund të përdorim disa toptha të përgatitura nga mbetjet e brumit sfoliatë. E vendosim në një tepsi me letër furre, dhe e fusim në furrë me ventilim të paranxehur në temperature 185 °, për 25 minuta, ose 195° në furrë statike për 25 minuta.
E zbukurojmë sipas dëshirës, me ullinj të mbushur, me speca të prerë në feta, rripa proshute, piper të kuq, etj.
