Zgjedhjet e pjesshme lokale mbajtur ditën e djeshme më 6 mars në gjashtë bashki të vendit, kanë theksuar edhe një herë krizën që mbizotëron në Partinë Demokratike të Shqipërisë, e cila në këtë garë qe e ndarë në dy fraksione, në “Shtëpinë e Lirisë” së Berishës dhe PD-në e Bashës, përballë PS-së së Ramës.
Sipas rezultateve paraprake të publikuara nga KQZ, bashkia e Shkodrës është fituar prej kandidatit të Berishës, Bardh Spahiut, e po ashtu edhe në Vorë kandidati i Berishës, ka marrë 700 vota më shumë, përkundër atij të Bashës, ndërkohë që Partia Socialiste e Ramës ka fituar 5 nga 6 bashki.
Sipas deklaratave të tri liderëve, Basha i cilëson këto zgjedhje si anomali të anomalive, situata dhe rezultati i të cilave ka ardhur si pasojë e manipulimeve të zgjedhjeve, si atyre lokale më 30 qershor 2019, e po ashtu edhe atyre vendore në 25 prill 2021.
E kam bërë të qartë, tha Basha në fjalën e tij përpara gazetarëve, dhe nuk ka qyetar që nuk e di, se zgjedhjet e 6 marsit ishin anomali të një anomalie. Anomalia e parë që ndodhi ishin votimet monisiste të 30 qershorit 2019, anomalia e dytë, ishte që katër nga kryebashkiakët monist dolën me rekorde kriminale, njëri ndërroi jetë dhe tjetri vendosi të kandidonte. Në këto kushte dhe në kushtet kur nuk ka asnjë reflektim për të tilla anomali si ajo e 25 prillit, që çuan në deformin e vullnetit të zgjedhësve, mendoi se shumica dërmuese e ka kuptuar edhe më qartë nevojën për një reformë të thellë. Një reformë zgjedhore, që është arsyeja kryesore përse ndodhemi në atë parlament. Në fakt qytetarët në këto 6 bashki e braktisën procesin zgjedhor, sepse nuk kishte asnjë garanci shtesë. PD-së iu mohuan komisionerët. Aleanca e nongratave, kërcënoi bashkë me bandat në Vorë. Ne kemi dorëzuar në SPAK 3 denoncime, për Shkodrën, Vorën dhe Rrogozhinën dhe kemi kallëzuar po ashtu edhe KZAZ-në e Vorës.
I pyetur se a do largohej më në fund nga kreu i PD-së edhe pas kësaj humbjeje, Basha deklaroi se nuk kishte humbur asnjë garë, e se ata që prisnin që ai të jepte dorëheqjen, do të zhgënjeheshin: Unë nuk kam humbur asgjë garë tha Basha në jetën time, tha ai, por, por jam përballur me masakra zgjedhore. Kushdo që kërkon që unë të braktis detyrën time në këto dy plane kryesore të betejave që u ofrojmë shqiptarëve, rikthimin e besimit tek vota e lirë dhe demokracia, përmes një reforme të thellë të sistemit zgjedhor dhe përshpejtimin e reformimit të PD-së, për t’u bërë partia e hapësirës së mendimit të lirë, partia e qytetarirë, partia e shpresave të shqiptarëve, do të zhgënjehet.
Ndërkaq Rama, përmes një statusi e cilësoi legjitime fitoren, duke e vendosur atë nën hijen e shqetësimit sjell prej konflikti në Ukrainë.
Zgjedhjet e djeshme i dhanë Partisë Socialiste as më shumë e as më pak se sa prisnim, shkruan Rama në statusin e tij. 5 nga 6 bashkitë në garë – me një fushatë pa i ndezur motorët e qendrës dhe me një hendek votash nga rivalët edhe më të madh se sa tregonin projeksionet tona. Urime fituesve dhe faleminderit të gjithë atyre që u angazhuan për këtë rezultat, po mbi të gjitha faleminderit zgjedhësve, të cilët dje ushtruan pushtetin e tyre vendimmarrës në interes të komunitetit. Thënë kjo, nuk rri dot pa shtuar sot se ajo që po ndodh në më pak se dy orë vijë ajrore nga Shqipëria, e bën të pamundur shijen legjitime të kësaj fitoreje, shkruan mes të tjerave Rama, duke e adresuar vëmendjen tek pasojat e kësaj lufte.
