Jemi në stinën kur perimet, lëngjet dhe supërat, kanë tejet rëndësi për një trup të shëndetshëm, plot imunitet.
Për sot, shef Mondi na sugjeron kremin e kungullit me microgreen, një recetë e thjeshtë për këdo që dëshiron të hajë shëndetshëm e me shije.
Masat për 4 persona
Kungull dimri, 1 kg
Lëng perimesh, 1 litër
Patate, 200 gr
Qepë e bardhë, 80 gr
Vaj ulliri ekstra i virgjër, 20 ml
Kripë, sipas dëshirës
Piper i zi, sipas dëshirës
Arrë myshku, sipas dëshirës
Microgreen amaranthi 3 gr
Pastrojmë kungullin lëkura e fara, pastaj e presim në kubike te vegjel. Përfitohet rreth 600 gr tul.
Qërojmë patatet, dhe i presim po në kubikë të vegjël.
Qërojmë qepën, e grijmë imët dhe e kaurdisim në tenxhere me dy lugë vaj ulliri, me zjarr të ulët, derisa të bëhet transparente. E përziejmë vazhdimisht, që të mos digjet e të gatuhet në mënyrë të njëtrajtshme.
Shtojmë kungullin, patatet, dhe i gatuajmë bashkë me qepën për 1 minutë.
Shtojmë lëng perimesh sa të mbulohen perimet, dhe ngremë zjarrin që të marrë valë të plotë.
Pasi të marrë valë, i hedhim kripë e piper sipas dëshirës, dhe e lëmë të vlojë për 25 deri 30 minuta.
I shtojmë herë pas here nga lëngu i mbetur, derisa të gatuhen perimet. Kur perimet të jenë gatuar, fikim zjarrin dhe me ndihmën e nje mikseri me zhytje, e kthejmë të gjithë masën në një krem të lidhur e homogjen. Grimjmë arrë-myshkun , shtojmë vajin e ullirit që na ka mbetur, dhe e trazojmë mire, që të aromatizojnë kremin.
Shërbehet në pjata të ngrohta, duke i shtuar microgreen amaranthi në çdo pjatë dhe mund të shoqërohet shumë mirë edhe me kubikë buke të thekruar në furrë, me pak vaj ulliri.
