Ka premtuar uljen e kufirit për çdo notë sa i takon vlerësimit të testit të Matematikës, për Maturën 2021, ministrja e Arsimit Evis Kushi, e cila në një deklaratë për media ka bërë me dije se menjëherë pas protestave, ministria do të ndërmarrë një analizë të thellë sa i takon gjithë procesit të maturës dhe problematikave të mundshme
Menjëherë pas provimit të matematikës, ne ngritëm grupe të pavarura me ekspertë të fushës së matematikës, mësues me përvojë dhe maturantë, të cilët kanë analizuar në detaje dhe vlerësuar me shumë vëmendje çdo pyetje në test, përputhshmërinë me programin, saktësinë shkencore dhe nivelin e vështirësisë, tha Kushi. Prandaj, nisur nga shqetësimet e maturantëve, mësuesëve, prindërve, dhe padyshim duke konsideruar situatën e një viti jo normal e të vështirë të pandemisë, ku maturantët në të gjithë vendin kanë qenë cdo ditë në shkollë, përveç 10 bashkive me risk të lartë, ku për 6 javë mësimi u zhvillua onlajn, ne kemi vendosur të plotësojmë kërkesën e maturantëve, për të ulur kufirin minimal të pikëve për çdo notë. Gjithashtu, pas përfundimit të procesit të maturës shtetërore 2021, ministria e Arsimit, do të bëjë një analizë të thellë, me qëllim identifikimin e të gjitha problematikave të mundshme dhe rishikimin e plotë të të gjithë procesit të maturës, akteve rregullatore për këtë proces dhe administrimin e tij.
Kujtojmë që jo pak ditë më larg, maturantët protestuan me orë të tëra përpara Ministrisë së Arsimit, me pretendimin se testi i Matematikës, kishte qenë shumë i vështirë dhe jo sipas modeleve që ata kishin praktikuar.
Ndërkaq, një tjetër problematikë e cila është përfolur gjatë vitet e fundit në rrjet është edhe dalja e testeve të provimit, të cilat, si vjet, ashtu dhe sivjet, jo vetëm për sytë e maturantëve, por edhe për ato të opinionit publik, janë dukur të paqarta, kaotike dhe të kopjuara keq nga teste të ngjashme në shkollave të njohura, si Oxford apo Cambridge.
