Nga Afrim Krasniqi
Çfarë po ndodh me Ministrinë e Arsimit? Në një procedurë jo transparente (MAS thotë se është konsultuar me rrjetet profesionale të mësuesve dhe shoqatat e botuesve, grupime në dyshime të aryeshme për gjendje në konflikt interesi), MAS ka bërë publike listën me 500 libra që rekomandohen për t’u përfshirë në fondin e bibliotekave të shkollave.
Lista, krahas gjysmës së saj pozitive, ka edhe një numër të madh autorësh dhe botimesh me natyrë marketingu, të botuara me qëllim audience, pa asnjë filtër shkencor dhe kryesisht me autorë amatore, siç përmban edhe tituj me sponsorizim politik, nga autorë e shtëpi botuese. Me e habitshmja, në 500 librat e preferuar dhe të përzgjedhur të MAS, nuk bën pjesë ASNJË libër nga institucionet albanologjike, instituti i historisë, gjuhesisë, letërsia, antropologjia apo instituti arkeologjik. Asnjë. ASA? Asnjë. As botimi më i rëndësishem historik dhe shkencor, “Historia e shqiptarëve gjatë shekullit XX”, absolutisht asnjë. Po ashtu asnjë libër mbi demokracinë dhe shtetin e së drejtës, zgjedhjet dhe institucionet. Autor nga botimet albanologjike në Kosove? Jo dhe jo.
Imagjinoni kriteret e dijes dhe shkencës që zbaton MAS, sa refuzon apriori të gjitha institucionet shkencore krijuese për “fajin” e vetëm se ata nuk botojnë tek firmat private botuese & biznesit, nuk kanë mbështetje politike dhe se nuk bëjnë lobim në MAS? Imagjinoni sa larg ka shkuar lobimi personal dhe politik, sa brezave të rinj u ofrohen tituj e botime, midis të cilëve disa amatore dhe spekullativë dhe pa asnjë vlere shkencore e formimi, duke i privuar nga botimet e vetme shkencore që kanë kaluar testimin dhe vlerësimin shkencor dhe akademik!
MAS e mbylli Albanologjinë, por aktet kundër saj nuk mund të shkojnë deri tek censurimi dhe refuzimi zyrtar e në bllok i botimeve albanologjike, përfshirë tekstin më të rëndësishëm shkencor mbi historinë.
__________
METROPOLPOST.AL/ Sa më poshtë njoftmi i ministres Kushi, ku aktualisht lista e publikuar disa ditë më parë nuk gjendet më / “Page not found”
