Në konferencën për shtyp onlajn, me pyetje nga populli dhe gazetarët, i pyetur për cështjen e financimeve ruse dhe se a kishte marrë PS-ja të tilla, Rama tha se PS-ja nuk kishte marrë asnjë financim rus, duke qortuar të tërë ata që bëjnë si të habitur tani me lajmin e marrjes së financimeve ruse prej Bashës.
“Dua tju kujtoj juve”, tha Rama në përgjigje të pyetjes, “të gjithëve në fakt, që po e trajtoni me të drejtë këtë temë pas një publikimi të bërë nga Shtetet e Bashkuara, se kjo nuk është çështje e panjohur për ne. Kur ne e kemi ngritur, shumë prej jush përfshi dhe ata që hidhen përpjetë se e konsiderojnë mbase një tjetër gur për luftën e tyre të brendshme, na kanë përqeshur, dhe askush, prej një mase të madhe, qoftë të medias apo politikës, përveç Partisë Socialiste, nuk ka marrë përsipër të merret me këtë çështje. Dhe njëkohësisht ju kujtoj, se ka qenë një front i bashkuar politik dhe mediatik, për ta mohuar me të qeshur këtë çështje dhe ja ku jemi. Po këtë pyetje nuk keni pse ma drejtoni mua. Është një pyetje që duhet t’ia drejtoni prokurorisë, se politika ka bërë zgjedhjet e veta, media të vetat që rëndom nuk janë në interes të publikut. Drejtësia e ka trajtuar këtë çështje dhe nuk i ka dhënë kurrë përgjigje, kështu që është për të ardhur keq që sot, që shoh shumë që janë të skandalizuar, janë të shokuar, jo se duhej të na besonin ne kur kjo çështje u hap, por se duhej të bënin detryrën e tyre, dhe detyra e tyre nuk është që sa herë flas unë e sa herë flet Partia Socialiste, apo qeveria e Partisë Socialiste apo grupi parlamentar i PS, të skërmisin dhëmbët dhe të lëshojnë fjalë nga më të rëndat, duke përqeshur çdo gjë që ne themi, sidomos kur bëhet fjalë për kundërshtarët.“
