Janar-shkurti janë karakterizuar përherë nga një numër më i madh i të prekurëve nga virozat e stinës. Në kontekstin e një situate pandemike siç jemi, shquarja e virozës nga infektimi me covid, është padyshim më i vështirë, sidomos në rastin e të vegjëlve, të cilët, me gjasa, nuk dinë ta shpjegojnë dhe aq mirë se ç’ndiejnë kur janë pa qejf.
MetropolPost ka pyetur pediatren Ilsa Mula, se si munden prindërit t’i kuptojnë të vegjëlit e tyre në një situatë të tillë, dhe se çfarë duhet të bëjnë, në rast se fëmijët u paraqesin simptoma si temperaturë e kollë, që në fakt janë thuajse të njëjta si për virozën e stinës, ashtu dhe për covid-19.
Covid-19 është një virus që shkakton tek fëmijët të njëjtat simptoma si virozat stinore, sqaron pediatrja Ilsa Mula. Kështu që është tejet e vështirë ta dallosh nga ana klinike në është virozë stine, apo covid19. Siç edhe e dimë, të gjitha viruset, përfshi dhe koronavirusin, mund të shprehen me shenja tipike si rrufë, kollë, temperaturë, dhimbje veshi, mungesë oreksi apo simptoma jo specifike, si diare, të vjella dhe dhimbje barku. I vetmi element që mund të na ndihmojë në këtë rast, është të shohim kontekstin ku rron fëmija, pra në ka familjarë apo të afërm, edukatorë etj, që kanë rezultuar pozitivë.
Nëse simptomat zgjasin më tepër se tri ditë dhe kemi një kompromentim të gjendjes së fëmijës, pra duket i lodhur, i këputur, reagon dobët, prindërit duhet t’i drejtohen me patjetër mjekut, ndërkohë që nuk duhet të lënë asnjë çast pas dore, një hidratim të mirë të fëmijës me lëngje të ndryshme, si çajra, ujë, qumësht etj., dhe sidomos pastrimin e hundës me ujë fiziologjik. Po ashtu dhe regjimi i gjumit, është tejet i rëndësishëm për një imunitet të mirë, ashtu siç janë edhe ushqimi i shëndetshëm, si perimet, frutat, mishi, bulmeti etj.
Në shumicën e rasteve fëmijët janë asimptomatikë. Në rastet kur kanë simptoma, shumica zgjasin 2-3 ditë, dhe shumë rrallë ka komplikime, kohëzgjatja e të cilave varet nga diagnoza shoqëruese.
Në rast se fëmija rezulton pozitiv, atëherë duhet të bëhet menjëherë karantinimi i tij, t’i jepen sa më tepër lëngje, paracetamol në varësi të nevojës, dhe të ndiqet ngushtësisht nga pediatri përkatës.
