E teksa përgjithësisht njerëzit janë të prirur t’ua hedhin fajin mjekëve për problematikat e ndryshme në shëndetin e të afërmëve, një rast ndryshe e mbreslënës vjen nga Fieri për MetropolPost, ku familjarët e Vilson Beles, një pacienti që vuan aktualisht pasojat e covid-19, këmbëngulin me se s’bën që redaksia të publikojë falenderimin e tyre.
Mes të tjerave, familjarët e Vilson Beles falënderojnë mjeken Eneida Bozaxhiu, si dhe stafin e saj për kujdesin ndaj të shtrenjtit të tyre, e po ashtu edhe nëndrejtoreshën Rudina Degjoni dhe nëndrejtorin Abdylazis Can. Në shënimin e dërguar nga familja Bele në redaksinë e MetropolPostit, lexohet qartë ndjesia e mirënjohjes për punën e mjekëve, e po ashtu edhe mbështetjen e dhënë prej tyre.
Sa më poshtë, shënimi i plotë i familjarëve të Vilson Beles:
Vilson Bele 68 vjeç, në muajin tetor u sëmur me Covid. Gjëndja e tij shëndetësore nuk ishte mirë. Ai shfaqi probleme me frymëmarrjen dhe u trajtua me oksigjen në shtëpi. Në muajin janar iu shfaqën komplikacione në frymëmarrje dhe dhimbje në kraharor. Me urgjencë u paraqit në Spitalin Rajonal Memorial. Aty u prit nga mjekët, të cilët bënë një konsultë dhe vendosën të kryenin koronografinë, ku konstatuan dëmtime të arteries së anës së djathtë të zemrës dhe i vendosën dy stenda. Mjekja Eneida Bozaxhiu, së bashku me stafin e palodhur dhe të përkushtuar, bënë maksimumin për të përmirësuar gjëndjen e Vilsonit.
Në muajin shkurt u intubua, ku qëndroi për 15 ditë. Falë kujdesit të doktorëve, gjendja e tij u përmirësua dhe tashmë po trajtohet në pavion, duke u përmirësuar dita ditës. Ne si familjarë falënderojmë me gjithë shpirt drejtoreshën Rudina Degjoni dhe nëndrejtorin Dr. Abdylazis Can, të cilët, përveç suportit mjekësor, na kanë qëndruar pranë si një familje.