Ka përmbyllur ditën e djeshme fushatën elektorale në Tiranë, kreu i PS dhe kreu i qeverisë Edi Rama. Në fjalën e tij, ai u bëri apel shqiptarëve të dalin të votojnë masivisht të dielën, të votojnë numrin 12 për një të ardhme më të mirë të tyren e të vendit, e po ashtu drejt një epoke të re, ku politika si dhunë me pasojë vdekjen, do të marrë fund.
Në fjalën e tij Rama u bëri votuesëve thirrje ta “çojnë në shtëpi Ilir Metën, si turpi më i madh që ka pasur ndonjëherë Shqipëria në krye”.
Të gjithë duhet të votoni për Partinë Socialiste, tha Rama, dhe kini parasysh që nuk është Luli, se me Lulin rregullohemi, s’ka problem, ia gjejmë një vend për të flejt, problemi është gjetkë. Të mendosh sot për fëmijën, do të thotë të mendosh edhe për vajzën e Ilir Metës, e cila, siç vetë Ilir Meta thotë, i lutet, babi, mos pi, kthehu në shtëpi, babi mos pi, kthehu në shtëpi, e pra, në 25 prill, çoni në shtëpi Ilir Metën! Çoni në shtëpi Ilir Metën! Boll! Mjaft! Ilir Meta duhet të shkojë në shtëpi! Ilir Meta është turpi ynë. Është turpi i gjthë popullit shqiptar! Është turpi më i madh që Shqipëria ka mundur të ketë aty në krye. Ai turp duhet zhbërë në 25 prill, dhe turp kush voton Ilir Metën, turpëron veten, fëmijët, familjen e tij, turpëron të gjallë e të vdekur në shtëpinë e tij! Boll, boll, se nuk është shqipëria pengu I një njeriu që I ka lëshuar pëllumba dhe sorra bashkë!
Fjala e fundit në fjalimin përmbyllës të Ramës, qe për patronazhistët, të cilëve Rama u kërkoi që ditët mbetura, të mos rreshtnin së trokituri në dyert e shqiptarëve, në mënyrë që ata të votonin numrin 12:
Dhe për ta mbyllur, patronazhistët kanë këto tre ditë e këto tre netë, kohën kur karakteri i tyre duhet të provojë se nuk ka gjumë, nuk ka gjumë, nuk ka gjumë! Dhe nuk do të rreshtin trokitjet, derë më derë, në telefonat e të gjithë miqëve, kudo që njihni jashtë Shqipërisë. Ka vetëm një numër që jeni ju, është numri 12, 12a e pavarësisë, e flamujve evropinë, 12 e lindjes së Partisë Socialiste, 12a e artimetikës, 3×4 =12, mbylli Rama fjalimin e tij.
