Mbi 80 persona deklarohen të vdekur në Gjermani, si pasojë e shirave të rrëmbyeshme rënë këtyre ditëve në rajonin e Vestfalisë së Renit Verior, të cilat cilësohen si rreshjet më të fuqishme të 10 vjeçarëve të fundit në këtë zonë.
Sipas medieve vendase, në distriktin e Ahrweiler-it rezultojnë të humbur me qindra persona, ndërkohë që një zëdhënës i qeverisë bën me dije se rrjetet e telefonisë janë jashtë shërbimit, duke e bërë të pamundur komunikimin me shumë persona. Fshati Schuld, po ashtu, (me rreth 700 persona) është zhdukur krejtësisht.
Gjatë një vizite në zonë, kreu i Vestfalisë së Reinit Verior, Armin Lascet, e drejtoi gishtin nga ngrohja globale për klimën ekstreme që ka goditur vendin, duke theksuar se do t’u duhej të përshpejtonin masat mbrojtëse, sepse ngjarje të tilla mund të kishte shpesh.
E teksa kancelarja Merkel ka premtuar mbështetje të plotë për të tërë të prekurit prej kësaj katastrofe, Gjermania nuk ka qenë e vetmja që është prekur prej shirave të rrëmbyeshëm. Edhe Belgjika ka raportuar të paktën 11 persona të vdekur prej tyre, e po ashtu edhe Vendet e Ulëta, Luksemburgu e Zvicra, kanë deklaruar përmbytje të mëdha.
