E ka cilësuar Shqipërinë si një bazë strategjike tejet të rëndësishme për NATO-n dhe Shtetet e Bashkuara të Amerikës, ambasadorja amerikane Yuri Kim, gjatë fjalës së saj në ceremoninë e nisjes së stërvitjes “Defender Europe 21”, një më të mëdhave organizuar prej NATOS-s që prej Luftës së Dytë Botërore.
Në fjalën e saj, ambasadorja Kim theksoi rolin e rëndësishëm të Shqipërisë në këtë stërvitje, si një prej pikave më të rëndësishme strategjike në rajon.
Roli i Shqipërisë në aleancë është më i rëndësishëm se kurrë, tha ajo. Shqiptarët, kanë luftuar pranë nesh, krah për krah, në vende të shumta përreth globit. Ne kurrë nuk do t’i harrojmë sakrificat tuaja e do t’u jemi gjithnjë mirënjohës.
Së dyti, Shqipëria është një vend i veçantë me një vendndodhje strategjike si anëtare e aleancës. Ajo ofron një bazë të rëndësishme, që i jep mundësi NATO-s dhe Shteteve të Bashkuara, për t’iu përgjigjur emergjencave dhe krizave rajonale shpejt dhe në mënyrë efektive. Stërvitja e “Defender Europe 21” të përgatit për këtë koncept, sqaroi ajo, demonstron afësinë për të hyrë në Evropën Juglindore përmes Shqipërisë, dhe vërteton aftësinë e Shqipërisë për të pritur forcat shumëkombëshe.
Kjo stërvitje në Shqipëri është historike edhe për shkak se disa nga lëvizjet më të rëndësishme të stërvitjes “Defender Europe 21” do të ndodhin këtu, në portin e Durrësit, tha Kim. Ky operacion mbështetës logjistik, të cilin kemi ardhur ta shohim, demonstron njëkohësisht edhe aftësinë e ushtrisë së SHBA-së, për t’i vendosur forcat ushtarake strategjikisht në vendin ku duhet.
E njohim trimërinë tuaj dhe jemi krenarë t’ju kemi aleatë, përfundoi Kim fjalën e saj.
