Në një konferencë për shtyp mbajtur ditën e sotme, ministrja e Shëndetësë ka njoftuar se këtë të hënë, dt, 7.12 2020, në Tiranë nis testimi i shpejtë falas për të prekurit nga Covid-19. Ky testim do të kryhet nëpër ambulanca dhe ka vlerë vetëm nëse bëhet pesë ditët e para të prekjes nga virusi. Nëse kanë kaluar 5 ditë, atëherë pacienti do jetë i detyruar të bëjë tamponin.
Testimi i shpejtë i antigenit do të nisë nga dita e hënë, fillimisht në Tiranë dhe do të jenë epidemiologët që do ta kryejnë në kuadër të hetimit epidemiologjik në vatrat e evidentuara që do të vlerësohen prej tyre dhe që kanë një rëndësi kyçe për transmetimin e infeksionit, bazuar në udhëzuesin e miratuar nga Instituti i Shëndetit Publik dhe nga Komiteti Teknik i Ekspertëve, u shpreh Manastriliu. Në fazën e parë, duke filluar nga dita e hënë fillon testi i shpejtë i antigenit, që do të jetë i disponueshëm dhe në një shtrirje të shpejtë në të gjithë Njesitë Vendore të Kujdesit Shëndetësor. Kujtoj dhe informoj dhe qytetarët që Njësitë Vendore të Kujdesit Shëndetësor janë strukturat që aktualisht kryejnë testin klasik, atë të PCR dhe këto 10 muaj është kryer pikërisht nga strukturat tona të epidemiologëve, laborantëve, infermierëve, në njesitë e kujdesit shëndetësor në të gjithë vendin. Prej datës 20 Dhjetor testimi i shpejtë i antigenit do të shtrihet dhe në disa pika testimi të përcaktuara në disa qendra shëndetësore në Tiranë. Dhe më pas sipas një kalendari do të shtrihet dhe në disa struktura të kujdesit shëndetësor në të gjithë vendin. Planifikimi për të bërë testimin e shpejtë të antigenit do të bëhet nga mjeku i familjes, sipas fashave orare të sistemit të ekzaminimit elektronik, gjë që lehtëson organizimin, shmang grumbullimet dhe siguron parametrat e grupuar të mbrojtjes së shëndetit. Pikat e testimit do të bëhen të njohura në ditët në vijim dhe do të mbulojnë një numër të caktuar banorësh, sipas një ndarjeje gjeografike që tashmë është bërë në funksion të mbulimit të nevojave, në funksion të testimit diagnostik dhe hetimit epidemiologjik në terren. Prej datës 20 Dhjetor testet e shpejta të antigenit, do të vihen në dispozicion dhe të spitaleve rajonale për rastet e urgjencave të dyshuara, përpos testimit që aktualisht bëhet me metodën klasike të PCR.
Edhe pse Tirana është rrethi më i prekur deri më tani nga covid-19, me 10503 të prekur, nuk dihet se kur mund të nisë ky lloj testimi edhe nëpër rrethe, pavaresisht se ministrja Manastirliu theksoi datën 20 dhjetor. Ndërkaq, situata e covid-it në Shqipëri, po sipas Ministrisë, paraqitet si sa më poshtë:
Shpërndarja gjeografike e rasteve aktive sipas qarqeve:
Tiranë 10503
Durrës 1315
Elbasan 799
Fier 1443
Korçë 987
Vlorë 963
Shkodër 868
Lezhë 739
Berat 651
Kukës 404
Dibër 247
Gjirokastër 539
