Ka bërë një prej lëvizjeve më të forta të karrierës së tij politike, kreu i PD-së Lulëzim Basha, i cili, një ditë përpara nisjes së sezonit të ri parlamentar, ka shpallur vendimin se Berisha nuk do të jetë pjesë e grupit parlamentar të PD-së, derisa çështja e akuzave të Departamentit të Shtetit Amerikan ndaj tij, të zbardhen plotësisht në mënyrë ligjore.
Përmes një retorike, gjatë së cilës përpiqej të vinte në dukje keqardhjen për këtë vendim, por edhe detyrimin që i impononte situata, Basha tha se ky ishte një vendim që e merrte për të mirën e PD-së, demokratëve dhe Shqipërisë.
Për fat të keq, tha mes të tjerave Basha, kur ju të gjithë prisnit që gishti i përgjegjësisë të drejtohej drejt Edi Ramës, autorit, ekzekutorit, bashkëpunëtorit të masakrës së 25 prillit, të gjithëve bashkë na u desh të njiheshim me vendimin e Departamentit Amerikan të Shtetit, me shpalljen non grata, të ish presidentit, ish kryeministrit, liderit historik të PD-së, Sali Berisha.
Nga ana ime, prej dy muajsh e gjysmë, kam bërë përpjekjet më intensive për gjetjen e një zgjidhjeje në lidhje mbi këtë çështje. Partneriteti i PD-së me SHBA është i pacënueshëm, dhe duhet të vijojë të mbetet i tillë, në interes të demokratëve, të së ardhmes së Shqipërisë. Zoti Berisha e ka bërë të qartë që kjo është një çështje personale e tij, ku PD dhe grupi parlamentar i PD-së nuk duhet të përfshihen.
Për të shmangur çdo keqkuptim dhe për të konretizuar këtë qendrim të vetë zotit Berisha, kam vendosur që deri në përfundimin e shqyrtimit të kërkesës ligjore, për transparencë dhe zbardhjes së plotë të kësaj çështjeje në rrugë gjyqësore, zoti Berisha të mos jetë anëtar i grupit parlamentar të PD-së. Kjo do të shmangte keqpërdorimin e çështjes nga kushdo për të dëmtuar interesin e demokrateve dhe PD-së dhe do t’i hiqte alibinë cilitdo, për të mbrojtur të keqen e vetme të Shqipërisë, që është keqeverisja dhe korrupsioni 8 vjeëar i Edi Ramës.
Rrugëtimi i Berishës nuk ndahet dot nga rrugëtimi i PD-së. Këtë e kanë parasysh të gjithë, ndaj dhe ky vendim i sotëm nuk i cënon aspak kontributet e z. Sali Berisha, si lider historik i PD-së.
Ju më keni besuar drejtimin e PD-së, për të marrë edhe vendime që lëkundin emocionet tona, mirëpo secili prej nesh, duke nisur nga unë i pari, ka detyrimin për të sakrifikuar nga vetja për interesin e PD, demorkatëve, përfundoi deklaratën e tij Basha.
