TikTok, aplikacioni për ndarjen e videove në pronësi të kompanisë kineze ByteDance, ka nisur të funksionojë në Shtetet e Bashkuara, pas njoftimit të Presidentit të zgjedhur Donald Trump për “një urdhër ekzekutiv” të hënën, ditën e inaugurimit të tij, “për të zgjatur periudhën kohore përpara se ligji që e ndalon të hyjë në fuqi dhe të arrihet një marrëveshje” që ruan sigurinë kombëtare.
“Në marrëveshje me ofruesit e shërbimeve tona, TikTok është në proces të rikthimit të shërbimit”, thuhet në një deklaratë të këtij rrjeti social në X”. Falënderojmë presidentin Trump, që u ofroi qartësinë e duhur dhe garancinë furnizuesëve të shërbimeve tona, që nuk do të vuajnë asnjë penalitet, duke ua ofruar TikTokun mbi 170 milionë amerikanëve, dhe duke u mundësuar mbi 7 milionë bizneseve të vogla të lulëzojnë.”
“U kërkoj kompanive të mos e lënë TikTok të mbyllet!”, shkroi Trump në platformën e tij sociale “Truth”, duke siguruar se “nuk do të ketë përgjegjësi për kompanitë që nuk e lejuan mbylljen e TikTok-ut” përpara urdhrit ekzekutiv. “Amerikanët meritojnë të shohin inaugurimin tonë emocionues të hënën, si dhe ngjarje e biseda të tjera,” shtoi ai, duke iu referuar audiencës së madhe të përdoruesve amerikanë të kësaj platforme.
“Do të doja që Shtetet e Bashkuara të kishin 50% të aksioneve në një sipërmarrje të përbashkët. Pa miratimin e SHBA-së, nuk ka TikTok,” shtoi ai, duke ofruar një zgjidhje të mundshme për fatin e mëtejshëm të kësaj kompanie.
