Ka ardhur deklarata e parë zyrtare ndaj sulmit kibernetik në Amerikë, i cili deri më tani dyshohej se qe kryer prej hakerave rusë, që punonin për agjencitë e spiunazhit rus. Në fakt, deri më tani qenë mediat amerikane ato që e aludonin dicka të tillë, dhe vetëm të premten mbrëma, Sekretari Amerikan i Shtetit Mike Pompeo, ka pranuar se prapa këtij sulmi kibernetik, ndaj disa agjencive qeveritare e korporatave, ndodhet pikërisht Rusia.
Kjo që një përpjekje shumë domethënëse, dhe unë mendoj se është rasti që të themi se qenë rusët ata që e bënë këtë gjë, u shpreh ai gjatë një interviste në television. Ne po e shohim me imtësi se ç’ka ndodhur saktësisht, dhe një pjesë e informacionit do mbetet i klasifikuar, por mjafton të thuhet se ka qenë një përpjekje e konsiderueshme për përdorimin e një softueri nga palë të treta, për të trupëzuar një kod brenda sistemeve të qeverisë së Shteteve të Bashkuara, i cili tashmë duket se shfaqet edhe në sistemet e shoqërive private e qeverive në tërë botën, u shpreh ai.
Kjo është deklarata e parë që vjen prej një zyrtaritë lartë amerikan, i cili më parë ka kryesuar CIA-n.
Ndërkaq, teksa fliste për rrjetin CNN, senatori amerikan Dick Durbin i Ilinoisit, e quajti sulmin ndaj agjencive qeverisëse dhe shoqërisë amerikane “praktikisht si një deklaratë lufte”.
Ne nuk mund të jemi miq me Rusinë, dhe ajo t’i bëjë këtë lloj sulmi informatik Amerikës. Kjo është praktikisht një deklaratë lufte virtuale e Rusisë ndaj Amerikës dhe ne duhet ta marrim seriozisht, mësohet të ketë thënë ai.
