Ka tronditur mbarë opinionin publik aksidenti i ndodhur sot në mëngjes rreth orës 8.30 në aksin rrugor Levan-Vlorë, ku humbi jetën një familje e përbërë prej katër personash.
Sipas informacioneve nga terreni, aksidenti ka ndodhur në afërsi të hyrjes së Vlorës, në vendin e quajtur ‘Kripa’, ku një automjet luksoz ‘Audi’ i 2020-s, i ngarë me shpejtësinë mbi mbi 150 km në orë prej një 22 vjeçari (me dy bashkëmoshatërë pasagjerë), godet dhe nxjerr nga rruga automjetin tjetër tip Toyota, me të cilin po udhëtonin anëtarët e familjes së ndjerë.
Si pasojë e përplasjes dhe daljes së menëjherëshme nga rruga, kanë humbur jetën katër anëtarët e familjes që udhëtonin me Toyota-n me targa greke, ndërsa tri të rinjtë që ngisnin automjetin luksoz, janë përpasur pas një shtylle, por jashtë rrezikut për jetën.
Familja që ka humbur jetën nga aksidenti, është identifikuar si familja Gushi nga Patosi, e cila apo kishte ardhur nga Greqia dhe po shkonte për pushime në Vlorë. Nga goditja e fortë, të katër anëtaret e familjes Gushi, Eduarti 44 vjeç, bashkëshortja e tij Silvana 33 vjeçe, si dhe fëmijët e mitur A. Gushi, 14 vjeç dhe E. Gushi, 9 vjeç humbasin menjëherë jetën dhe trupat e tyre mezi nxirren nga makina, për shkak të shpërfytyrimit krejtësisht të makinës, ndërsa tri të rinjtë që ndodheshin tek Audi (Igli Madani, 22 vjeç, Fabio Lamaj, 21 vjeç e 24-vjeçari Glorian Selimaj), janë dërguar në spitalin e Vlorës, ku sipas mjekëve, dy ndodhen jashtë rrezikut për jetën.
Nisur nga rasti në fjalë, nëndrejtori i Policisë së Shtetit, Albert Dervishaj, në një konferencë për shtyp, ka shprehur keqardhjen për humbjen e jetës së katër familjarëve, dhe është shprehur se angazhimi i Policisë së Shtetit, ka nevojë edhe për mirëkuptimin dhe ndërgjegjësimin e të gjithë drejtuesve të mjeteve.
Dua të theksoj, tha ai, se angazhimi ynë maksimal në terren ka nevojë për mbështetje, për mirëkuptimin dhe ndërgjegjësimin e të gjithë drejtuesve të mjeteve. Aksidentet rrugore sot marrin katër herë më shumë jetë se ngjarjet kriminale në vend, dhe besoj kjo është mjaftueshëm për këdo, të kuptojë se sa e rëndësishme është sjellja e kujtdo, në rrugë.
Së fundmi, dua t’i siguroj të gjithë se Policia e Shtetit do të vijojë të përforcojë masat, jo në funksion të ndëshkimit si qëllim, por për të mos lejuar që drejtuesit e mjeteve t’i kthejnë këto të fundit në rrezik real për veten dhe qytetarët e tjerë.
Policia e Shtetit apelon për të gjithë drejtuesit e mjeteve që të tregojnë kujdes të shtuar dhe të respektojnë rregullat e qarkullimit, gjithashtu KUJDES, shpejtësia vret, përdorimi i alkoolit në drejtimit e mjetit vret, parakalimi i gabuar vret, mbajtja e rripit të sigurimit për vete dhe pasagjerët shpëton jetë.
Kontributi i të gjithë përdoruesve të rrugës, respektimi në maksimum i rregullave të qarkullimit nga ana e tyre, denoncimi i çdo shkeljeje rrugore të konstatuar, si dhe përkushtimi akoma më i madh i punonjësve të policisë, ku së fundmi kemi shtuar në disa akse rrugore nacionale disa radarë të tjerë, makina të pauniformuara, kamera dhe dronë, do sjellë medoemos parandalim të aksidenteve, rritje të parametrave të sigurisë në rrugë dhe ndëshkim të kujtdo që shkel këto rregulla, ka përfunduar ai.
