Menjëherë sa u duk se fitorja po anonte nga Partia Socialiste, ka reaguar në një deklaratë për shtyp edhe presidenti i vendit Ilir Meta, i cili, jo më larg një ditë përpara zgjedhjeve të 25 prillit deklaroi se në rast fitoreje të Ramës, do jepte dorëheqjen. Por edhe pse Rama fitoi, në fjalën e sotme të Metës, asnjë rresht nuk u dëgjua për dorëheqjen e tij. Meta tha se sfida e tij madhore dy vitet e fundit kishte qenë që populli të shprehte mendimin e tij të pavarur, e se qe shumë i lumtur që ia kishte dalë mbanë që 25 prilli të qe një ditë e qete e paqësore, me një votim masiv.
Në këto momente, tha ai, është tepër e rëndësishme, që ky proces të përmbyllet qetësisht dhe që çdo votë, nga Vermoshi në Konispol, të numërohet dhe të administrohet sipas ligjit. Deri në shpalljen e rezultatit përfundimtar, partitë politike dhe përfaqësuesit e tyre duhet të dëshmojnë maturi dhe qetësi.
Sfida ime madhore, sidomos këto dy vitet e fundit, ka qenë që Sovrani të shprehë i lirë vullnetin e tij dhe që Shqipëria të rikthehet në shinat e Kushtetutës, të parlamentarizmit dhe në normalitet politik. Edhe pse i vetëm përballë të gjithë institucioneve të kapura, ja arrita, që 25 Prilli të ishte një ditë e qetë, paqësore, pa skena dhune dhe me pjesëmarrjen tuaj masive për të ushtruar të drejtën e votës. Ndonëse dukej një sfidë e pamundur jam i lumtur, që 25 Prilli mund t’i shërbejë demokracisë dhe stabilitetit të vendit.
Tani është koha për të përmbyllur me qetësi dhe në respekt të ligjit procesin zgjedhor dhe më pas të gjithë të reflektojnë deri në shtator, kur krijohen institucionet e reja, që burojnë nga vota e 25 Prillit, tha Meta.
