Nga shef Mondi
Ndryshe nga receta tradicionale e gjelit të detit me përshesh, shef Mondi na propozon një tjetër pjatë gjeldeti për natën e ndërrimit të viteve, atë me fruta të thata. Shohim recetën.
Për gjelin
Gjel deti, 3 deri 3,5 kg
Rozmarinë, 2 degë të freskta
Dafinë, 6 gjethe
Fara korianderi, 1 lugë gjelle
Xhinxher, një copë 2 cm të gjatë
Hudhra, 3 thelpinj
Uthull balsamike, 50 ml
Verë e bardhë e thatë, 100 ml
Piper i zi, sipas dëshirës
Kripë, sipas dëshirës
Vaj ulliri extra i virgjër, për të lyer gjelin
Për frutat e thata
Arra, 150 gr
Bajame të zhvoshkura (pa lëkurë), 150 gr
Rrush i thatë, 70 gr
Fara kardamomi, 10 copë
Shkop kanelle, 1 copë
Yll anisë, 2 copë
Manxuranë, 2 degë të freskëta, ose 1 lugë çaji të thatë
Gjalpë, 20 gr
Grijmë në një mikser rozmarinën, xhinxherin, hudhrën, dafinën, koriandrin dhe piperin. Masën që doli, e përziejme me verën, uthullën balsamike dhe kripën, dhe me të lyejmë mirë gjelin jashtë e brenda, e po ashtu edhe pjesën mes lëkurës së gjelit dhe krahërorit.
E lëmë gjelin të marinohet në frigorifer 4 deri 6 orë, duke e kthyer here pas here.
Vendosim rrushin e thatë në ujë të ftohtë, që të vijë.
Nxjerrim nga frigoriferi gjelin, e vendosim në një enë furre me kapak dhe e lyejmë me vaj ulliri. Ndezim furrën në temperaturën 165 gradë, dhe kur të jetë gati fusim gjelin, të cilit i kemi hedhur një gotë ujë në fund të enës. E pjekim për 2 orë e 30 minuta, duke e lyer here pas here lëkurën e gjelit me vaj ulliri.
Kur gjeli të jetë gati, e nxjerrim nga furra dhe e lëmë të ftohet pak. Nëse lëkura s’është bërë kërce, e pjekim edhe për 15 minuta pa kapak, me temperaturën 220°.
Ngrohim në një tigan gjalpin, shtojmë arrat, bajamet, kardamomin e shtypur pak, kanellën, yllin e anisës dhe manxuranën dhe i tiganisim për 3 minuta, duke i përzierë vazhdimisht.
E vendosim gjelin në tryezë, dhe e shoqërojmë me frutat e thata të tiganisura.
Gëzuar!
