Gjatë fjalës së tij në mbledhjen që po zhvillohet aktualisht pranë Kuvendit të Shqipërisë, ku grupi Paramentar i Partisë Socialiste nis procesin e identifikimit të kandidaturës për Presidentin e Republikës, kreu i qeverisë Rama nuk ka harruar të shigjetojë edhe presidentin aktual të vendit, Ilir Metën. Teksa e ka cilësuar si presidenti me tonelatat më të larta të teneqeve të Shpërndara në Shqipëri qysh në kohën e bronzit, Rama ka deklaruar përgatitjen e një ligji për figurën e Presidentit e po ashtu edhe për ngritjen e një sistemi me rregulla të mirëpërcaktuara për dhënien e dekoratave e medaljeve prej tij.
Kemi të vetmin sistem pa sistem për shpërndarjen e medaljeve në botë, u shpreh mes të tjerave Rama. Grupi i punës që ka hartuar projektin, ka studiuar të gjitha kontinentet dhe në të gjitha kontinentet, që nga Britania e Madhe, në Japoni, nga Polonia në Australi, nga Nigeria në Brazil, sistemi i titujve dhe i medaljeve është sistem i njohur, nuk ka 100 sisteme. Shqipëria bën përjashtim nga e gjithë kjo, kur falë ilir Metës dekorohen të vdekurit dhe u jepen medalje dëshmorëve të luftës, që në logjikën e medaljeve, përbën një shkelje edhe më të rëndë se sa shkelja e Kushtetutës.
Ilir Meta e ka bërë Shqipërinë qesharake me dekret presidencial. Na duhet një njeri normal në krye të shtetit dhe për ta gjetur duhet të niseni nga e kundërta e Ilir Metës, tha mes të tjerave Rama në fjalën e tij në nisje të procesit të identifikimit të kandidaturave për president nga Grupi Parlamentar, i Partisë Socialiste.
