Rruga e Dibrës është një prej akseve kryesore të kryeqytetit, së bashku me rrugën e Kavajës, atë të Durrësit, rrugën e Elbasanit e disa të tjera, por edhe pse e tillë, edhe pse shumë pranë qendrës historike të Tiranës dhe sheshit Skënderbej, në këtë udhë ku shkojnë përditë një numër shumë i madh qytetarësh, arrin të shohësh thuajse pak ose aspak zbukurime festive.
Në fakt janë vetë qytetarët, ose dyqanet buzë rruge, që janë përpjekur t’i japin një farë atmosfere festive asaj, duke zbukuruar me drita secili pjesën e vet, e secili sipas mundësive.
Por nga Bashkia e Tiranës nuk duket asgjë. As nga Njësia Bashkiake nr.8, e cila ka dhe zyrat buzë saj. Dhe me të drejtë, banorët e kësaj rruge, por edhe të krejt rrugëve në kryeqytet, kanë të drejtë të pyesin për taksat e tyre, dhe për arsyen përse Bashkia s’po u dedikon paska atmosferë festive këtë vit.
Duket në fakt, sikur Bashkia e ka braktisur këtë zonë, duke i lënë qytetarët të pushtohen nga hija e trishtë dhe e zymtë e atmoferës së munguar festive, e cila ndihet edhe më fort sapo nisesh për nga sheshi Skënderbej drej saj.
Rrëzëllitja e bulevardit Dëshmorët e Kombit dhe dritat e sheshit Skënderbej, e bëjnë edhe më të fortë diferencimin, i cili, sa më tutje shkon drejt Medresesë, aq më fuqishëm ndihet.
