Fituesi amerikan i çmimit Nobel Joseph Eugene Stiglitz ka deklaruar se taksat që Trump po vendos poshtë e përpjetë nëpër botë, thjesht e bëjnë atë një mashtrues, duke hapur një luftë që nuk mund ta fitojë askush.
I intervistuar nga “La Repubblica”, Stiglitz analizon drejtimin e ri të Shteteve të Bashkuara dhe sugjeron që Evropa të mos i konsiderojë më SHBA si “një aleat të besueshëm”.
Stiglitz e përkufizon Trumpin si “mjeshtër i mashtrimit”, i bindur se ai “ka shkelur çdo rregull në lidhje me konfliktin e interesit” dhe se shoku i tij Elon Musk ka shkuar edhe më përtej.
Sa u takon taksave, “ato do të hapin një luftë tregtare që askush nuk do mund ta fitojë”.
Kur ai shkroi librin e tij të fundit, “Rruga drejt Lirisë”, Trump nuk ishte zgjedhur ende. A është ajo rrugë më e vështirë sot?
.“Beteja është bërë më e vështirë, një nga pikat kryesore të librit tim, është se liria e një personi, mund të shtypë ose pakësojë lirinë e tjetri”
“Shoqëria duhet të gjejë një ekuilibër. Mund të arrijmë në zgjidhje të pranueshme dhe më duket se liria për të jetuar është më e rëndësishme se sa liria për të blerë një kallashnikov, apo për të mos mbajtur maskë kur shpërthejnë pandemitë”, thekson Stiglitz. ” Çfarë ka ndryshuar me Trumpin? Ai është i bindur se liria jonë do të thotë të shfrytëzojmë këdo, të përdorim pasurinë, fuqinë tonë financiare. Shembulli i fundit është anulimi i ligjit që ndalon praktikat korruptive jashtë vendit”.
“Ekonomistët e krahut të djathtë si Milton Friedman”, shpjegon më tej ai “e trajtojnë konceptin e lirisë ekonomike duke përdorur fjalë si tregu i lirë. Ata e identifikojnë neoliberalizmin me lirinë nga çdo rregullim dhe madje edhe nga çdo taksë. Ata mendojnë se roli në rritje i qeverisë, në mbrojtjen e punësimit ose propozimin e sistemeve të mirëqenies, shkon në drejtim të kundërt. Mendoj se janë krejtësisht të gabuar”, shprehet mes të tjerave Stiglitz në intervistën e dhënë. .
