Plagosja e shkrimtarit me famë botërore Salman Ruzhdie, ka ngjallur mjaft reagime, mes së cilave edhe ai i studiuesit Ag Apolloni, i cili përmes një shënimi në faqen e tij në fejsbuk, i fton myslimanët ta kapërcejnë Mesjetën sa u takon mënyrave përçudnuese të hakmarrjes ndaj atyre që u shajnë Zotin, e të përpiqen të vijnë në shekulli e sotëm.
Meqë në ligjëratat e mia për ikonoklastiken në letërsinë postmoderne, zakonisht kam folur për José Saramagon dhe Salman Rushdien, mund të them se të krishterët, pavarësisht pakënaqësive të shprehura ndaj Saramagos (por edhe ndaj Kazantzakis e Unamunos), nuk e sulmuan me thikë autorin, edhe pse Saramago ka qenë shumë më sulmues e parodizues ndaj religjionit (Zotit, Krishtit dhe Biblës) sesa Rushdie (ndaj Kuranit dhe Muhamedit). Kjo do të thotë që të krishterët, sado me vështirësi të madhe, e kanë tejkaluar Mesjetën, ku, mjerisht, kanë ngecur muslimanët. Lutem që edhe këta vëllezër tanë të dalin në shekullin tonë. 🙏 Pa thika, sigurisht. E, nëse u duhet dikush për t’ua treguar rrugën, nuk mund t’u sugjeroj kallauz më të mirë se Salman Rushdie.
Dhe mos harroni një gjë: me një sy më pak, me një autor më pak, me bojë a me gjak, letërsia gjithmonë do të fitojë, shkruan studiuesi Ag Apolloni, në faqen e tij në fejsbuk.
