Kreu i qeverisë Edi Rama e ka cilësuar sinjë valle mes të marrësh në buzën e humnerës, përplasjen e dy krerëve të PD-së Berisha-Basha. Mes të tjerave, Rama tha se kjo situatë qe tragji-komike, nga e cila do të humbiste vetëm Partia Demokratike.
Është telenovela e një marrëzie e cila tanimë ka dalë komplet në sipërfaqe tha Rama mes të tjerave mbi këtë përplasje, dhe që faktikisht, nëse e sheh se si shpaloset, me cfarë personazhesh dhe argumentash, është e dhimbshme për këtë vend, për këtë popull dhe mbi të gjitha, për të gjithë ata që i kanë besuar deri më tani e që vazhdojnë tu besojnë madje, protagonistëve të kësaj telenovele. Është një histori të marrësh. Kjo është marrëzi. Është përtej luftës për pushtet.
Në vendin tonë, pas 31 vjetësh liri dhe përpjekje për të ndërtuar një sistem demokratik, të dalë një njeri non grata, pasi ka qenë president, kryeministër, dhe të damkoset, si një nga personat që përbëjnë listën e zezë të SHBA, kjo është shumë e dhimbshme dhe shumë e rëndë. Por qe ky njeri tani të kthehet në personin që predikon shpëtim, është marrëzi kjo pastaj, është tragji-komike, është groteske. Nga ana tjetër, është marrëzia e atij tjetrit, kështu që është një valle mes të marrësh në buzën e humnerës, ku praktikisht do të bjerë Partia Demokratike e Shqipërisë.
