Në deklaratën e tij, mes të tjerave, kreu i qeverisë Rama nuk ka pa prekur as kantieret e ndërtimit në vend, të cilat janë kthyer realisht në shqetësime për banorët e zonave.
Sipas Ramës, së shpejti del Rregullorja e re për Kantieret e Ndërtimit, e cila do të përfshijë masa drastike për këdo nga ndërtuesit që nuk e zbaton.
“Tjetra shumë e rëndësishme”, tha Rama mes të tjerave, “është rregullojra e re për kantieret e ndërtimit. Kush ndërton pallat, nuk mund të bëhet problemi i zonës, por duhet të marrë të gjitha masat, që zona, aty ku bëhet fjalë për një zonë të banuar, të mos e ndjejë fare, në mos fare, shumë pak, të bëjë rrethimet e duhura, pastrimet e duhura, jo duke u hapur e duke zënë edhe trotuarin se po bën ti pallat, por duhe bërë kalimet në trotuar me strehën mbrojtëse etj, se ka disa rregulla. Është një rregullore e re që do t’u jepet ndërtuesëve dhe masat do të jenë drastike nëse do të thyhen rregullat.
Tjetra është se ne nuk po bëjmë me këtë përpjekje vetëm një punë për të hequr platformat e strukturat, edhe një kontroll të kantiereve. Mirëpo kantieret nuk dalin në televizor, se, si kundër edhe kur beteja shkon në Gjykatë, ata kanë një forcë të caktuar për të kontrolluar mediat, e kanë edhe një forcë të caktuar për të kontrolluar gjykatat. Gjithësesi këto janë sfida…” tha Rama mes të tjerave.
