Ka reaguar për prishtjen e godinës së maternitetit “Mbretëresha Geraldinë”, edhe Unioni i Arkitektëve, Urbanistëve dhe Planifikuesve të Shqiperisë.
Përmes një komunikate, Unioni shprehet se mënyra si po kryhet ndërhyrja e rikonstruksionit në këtë godinë, është aspak profesionale. Në komunikatë thuhet gjithashtu se kjo situatë është e përsëritur me Teatrin Kombëtar apo Stadiumin, dhe se është është tejet i kritikueshëm qëndrimi që institucionet e specializuara publike-shtetërore po mbajnë ndaj këtyre ngrehinave, që që, sipas Unionit, i përkasin një periudhe mjaft interesante të modernizimit të kryeqytetit.
Unioni i Arkitektëve, Urbanistëve dhe Planifikuesve të Shqiperisë, shprehin keqardhjen e madhe dhe protestën e tyre të vazhduar për mënyrën aspak profesionale dhe të përsëritur se si po kryhet ndërhyrja e rikonstruksionit në ndërtesën e radhës historike të Tiranës, maternitetit historik “Nëna Geraldinë”.
Kjo ndërtesë historike – ashtu si Parku, Stadiumi, Teatri dhe shumë vila të viteve 20/30të – përfshihet në fondin e objekteve me status special dhe/ose monument kulture, dhe i përkasin një periudhe mjaft interesante të modernizimit të kryeqytetit.
Autoritet duhet të garantojnë që në fazat e prokurimeve publike që projektimi dhe zbatimi i punimeve të tilla ka ekspertizën dhe kulturën e duhur për ndërhyrje të tilla me karakter thellësisht restaurues, dhe jo të bëhen promotorë të kësaj kulture pune qoftë përmes heshtjes dhe neglizhencës. Aq më tepër që gjithshka ndodh natën, pa transparencë dhe në kushtet e pandemisë.
Mjaft e kritikueshme mbetet edhe heshtja e institucioneve të specializuara publike-shtetërore për mbrojtjen e trashëgimisë, heshtje që i bën ata bashkëpërgjegjës në këtë akt aspak ligjor, thuhet në komunikatën e tyre.
