Ministrja e Infrastrukturës Belinda Balluku, ka deklaruar të hapur garën për aeroportin e katërt në vend, atë të Sarandës.
Hapet rruga për ndërtimin e aeroportit të katërt në Shqipëri, shkruan Balluku në rrjetet sociale. Sot lançuam zyrtarisht garën për ndërtimin e aeroporti të Sarandës, i cili do të jetë një portë më shumë për të gjithë vizitorët për të aksesuar bregdetin e jugut, por jo vetëm. Një vepër e rëndësishme, të cilën ashtu sikundër e kemi premtuar, do ta bëjmë realitet shumë shpejt.
Sipas bisedës së publikuar prej vetë Ballukut në rrjetet sociale, ky aeroport do të jetë i kadegorisë 3C, me një gjatësi piste prej 2200 metrash.
Fillimisht, sipas Ballukut, aty parashikohen rreth 150 mijë pasagjerë në vitin e parë, për të mbërritur një numër maksimal prej rreth 1 milion pasagjerësh në vit.
Për planin e fizibilitetit është shfrytëzuar një studim i bërë nga Ministria e Transporteve në 2010-n, studim i cili ka shërbyer edhe si bazë e ndërtimit të modelit aktual, ku janë bashkërenduar ndryshimet përkatëse. Investimi do të jetë tërësisht privat, pa asnjë përfshirje nga shteti sa i takon pjesës financiare.
Ky aeroport, theksoi ministrja Balluku, është aeroporti i katërt në vend, pas atij të Tiranës, Kukësit dhe Vlorës.
