Është treguar sërish i hapur sa u takon ndryshimeve kushtetuese kërkuar nga Basha, kreu i qeverisë Rama, i cili në përgjigjjen e dhënë gazetarëve, mbi pyetjen se a do të ishte dakord të ndryshonin Kushtetutën aty ku thoshte kreu i PD-së, ka theksuar se është pro ndryshimeve, pavarësisht se nuk mendon që e ka problemin Kushtetuta, për problemet që krijohen nga moszbatimi i saj. Teksa e zgjeroi më tej mendimin e tij mbi këtë çështje, Rama theksoi se nuk do të pranonte më dialog opozitë-qeveri në anglisht, pra ndërhyrjen e diplomatëve të huaj, e se gjithëka që kishin për të diskutuar, duhej ta bënin në shqip.
Së pari, tha Rama, Kushtetuta nuk ka asnjë problem që të justifikojë problemet që krijohen nga mosrespektimi i saj. Së dyti, vetëm Biblën dhe Kuranin s’mund ta ndryshojmë, çdo gjë tjetër mund të ndryshojë, përfshi dhe Kushtetutën, se nuk është e shkruar në gur. Së treti, një reformë e thellë kushtuese, që do të ndryshonte tërë arkitekturën konstiucionale të shtetit, mund të ketë vend për diskutim, por është një ndërmarrje që kërkon angazhim të një natyre tjetër, dhe sigurisht shumë kohë. Në parim unë jam për ndryshimin, dhe them se gjithmonë ka mundësi për ndryshim e se asgjë nuk është e pandryshueshme. Thënë kjo, nuk jemi në këtë moment sot, dhe nuk është në vizionin apo në qëllimet tona, që t’i hyjmë këtij ndryshimi, se nuk na duket se është domosdoshmëri e kohës sot. Nëse të tjerët kanë ide të kësaj natyre, janë të mirëseardhur t’i diskutojmë, çdo gjë duhet ta diskutojmë, duhet të mësohemi ta diskutojmë, por një gjë do të them në fund, do ta përsëris dhe në sy të Ambasadorit: në këtë vend, të paktën sa të jem unë këtu, dialog mes qeverisë dhe opozitës në anglisht nuk do bëhet më. Nuk kemi asnjë arsye që t’i vëmë në pozitë edhe miqtë tanë, edhe parnerët tanë, hajdeni ju, futuni në mes, shko tek ai, hajde këtu, na mblidhni aty, futuni atje… ne nuk kemi pse flasim anglisht me njëri-tjetrin, ne kemi gjuhën shqipe, tha mes të tjerave Rama.
