Teksa qe thënë se më 1 korrik do të niste edhe gjobitja e bizneseve, nëse nuk e kishin bërë procesin e fiskalizimit, drejtoresha e Tatimeve Ibrahimaj, në daljet e saj publike që prej 1 korrikut, ka theksuar vazhdimisht se gjobat reale për mosfiskalizimin e bizneseve, do të nisin nga 1 janari i 2022-it, ndërkohë që stafi i tatimeve, do përpiqet të ndihmojë biznesin të integrohet në këtë proces. Në intervistën e dhënë për Euroneës Albania, Ibrahimaj theksoi se nuk do të gjobiten ata që faturojnë me kasë, por vetëm ata që nuk faturojnë fare.
Duke konsideruar fluksin e madh për aplikimin e çertifikatave elektronike, gjithashtu duke konsideruar një sërë ankesash të subjekteve, për lënien kohë të tyre, për adaptimin me këtë sistem, qeveria mori këtë masë, që do të thotë se ne nuk do të vendosim penalitete për moslëshimin e faturës elektronike, por sigurisht do të vendosim penalitete nëse ti nuk vendos faturë fare, pra do të lejojmë dhe do të kemi një qasje këshilluese dhe sensibilizuese me subjektet, siç e kishim paralajmëruar kohë më parë.
Çdo subjekt që ka për t’u fiskalizuar më datën 1 korrik, do të kontaktohet nga administrata tatimore, me qëllim që të kuptojmë problematikën e subjektit dhe të mundohemi ti suportojmë në zgjidhjen e tij.
Nëpërmjet këtij vendimi, ne patjetër që do të shtyjmë afatin e dorëzimit të librave deri në 1 janar, pra librat mund të dorëzohen deri në 1 janar, siç janë dorëzuar deri dje, dhe nuk do të ketë asnjë lloj problematike për këtë udhëzim, sqaroi Ibrahimaj.
