E ka cilësuar si ‘gazi i botës, që ka shembur garantin e unitetit tonë kombëtar’ kreun e shtetit Ilir Meta, kreu i qeverisë Rama gjatë fjalës së tij në Parlament, ku edhe merret sot vendimi për shkarkimin e të parit.
Në fjalën e tij Rama e ka ftuar Parlamentin ta ushtrojë pa ngurrim, vullnetin e më shumë se 90% të popullit shqiptar, duke theksuar se tashmë Meta ka mbaruar punë me rolin e Presidentit e se tani duhet të flasë Parlamenti me votë.
Ilir Meta ka tradhtuar misionin e Presidentit të Shqipërisë, tha Rama. Ilir Meta ka poshtëruar Kushtetutën e Republikës së Shqipërisë. Ilir Meta ka shembur institucionin e garantit të unitetit kombëtar. Ilir Meta ka dhunuar kufirin jetik të ndarjes se pushteteve në demokracinë tonë parlamentare. Ilir Meta ka turpëruar Shqipërinë dhe popullin shqiptar në marrëdhënien krejt speciale me SHBA. Ilir Meta ka zhgarravitur fytyrën e shteti shqiptar në marrëdhënie me përfaqësitë e bashkësisë demokratike ndërkombëtare në Shqipëri. Ilir Meta i ka humbur plotësisht dhe përfundimisht të gjitha shanset që i janë dhënë bujarisht në mënyrë të përsëritur, për t’u kthyer në binarët e arsyes morale dhe ligjore. Shqipëria nuk mund ta mbajë më në kurriz Ilir Metën, duke u bërë gazi i botës në sytë e miqëve të saj dhe të vetë qytetarëve të saj, prandaj ky Parlament, sot, duhet të ushtrojë pa ngurrim vullnetin e më shumë se 90% të popullit shqiptar, për ta shkarkuar Ilir Metën nga detyra. Keqardhje për mikun tonë të dikurshëm Ilir, por Meta i sotshmëm nuk mund të ketë kurrësesi më statusin e lartë që i ka dhënë Parlamenti. Ilir Meta ka mbaruar punë me rolin që mori nga Parlamenti dhe fjalët për të si President kanë mbaruar. Tani të flasë Parlamenti me votë.
