U ka bërë thirrje gazetarëve të mos shpërqendroheshin nga shashkat e Ramës, por ta kishin mendjen tek krimi zgjedhor dhe tek vjedhja e votave, mesditën e sotme, kreu i shtetit Ilir Meta.
I pyetur mbi deklaratën e mbrëmshme të Ramës, se “Meta është një turp kombëtar, e se së shpejti do votonin shkarkimin e tij”, Meta u përgjigj se nuk do t’u jepte asnjë përgjigje shashkave që hidheshin për të shpërqendruar vëmendjen nga krimi zgjedhor.
Asnjë përgjigje për shashkat që duan të largojnë vëmendjen tuaj nga mbi 83 mijë vota të pavlefshme, që janë atje, dhe që me pamjet filmike duhet parë se si janë bërë të pavlefshme një pjesë e madhe prej tyre, sepse nuk ka statistikë në botë, që të justifikojë këtë rekord pavlefshmërie. Ndërkohë që ju e dini shumë mirë, që diferenca është jashtëzakonisht e ngushtë. Mund të lëvizin shumë mandate këtu, në të gjitha këto qarqet. Ne duhet ta mbajmë vëmendjen këtu. Po të ishte për këto histori, kishte ikur nja 100 herë Ilir Meta nga Presidenca, por ju e dini që unë e mbaj fjalën edhe më 24 korrik 2022, këtu do ta bëjmë konferencën e fundit së bashku.
Përqendrohuni këtu, mos u përqendroni asgjëkundi, as tek dorëheqjet, as tek tërheqjet, këtu përqendrohuni! Të respektohet çdo votë që është hedhur deri në fund. Të numërohet dhe rinumërohet, me transparencë dhe integritet të plotë, dhe që nga ky moment, të kenë shumë kujdes! Asnjë kuti të mos ndërrohet, dhe asnjë përpjekje për çfarëdolloj krimi që ka ndodhur atje të mos bëhet.
I pyetur nëse do ta mandatojë Edi Ramën si kryeministër, Meta nuk dha asnjë përgjigje.
Mos u merrni me gjëra që kanë kohën e tyre. Unë kërkoj të zbatohet Kodi Ygjedhor pikë për pikë, deri në fund, deri në shterimin e ankesës së fundit, nga partia më e re në këto zgjedhje, nga çdo individ, nga çdo kandidat edhe brenda partisë, se është shumë e rëndësishme të respektohen votat e çdo kandidati brenda çdo force politike, siç kanë votuar qytetarët. Përpjekjet me shashka, që të merremi me shashkat sa të mbarojë krimi zgjedhor, janë tentativë e dështuar, tha Meta. Zgjdhjet nuk kanë përfunduar, sqaroi ai, dita e votimit po. Administrimi vazhdon, rezultati vazhdon, dhe i ka të gjitha mundësitë për të qenë një rezultat vetëm paraprak, për arsye se proesi i numërimit nuk ka përfunduar ende dhe procesi i ankimimit apo i kontestimeve nuk ka nisur ende, përfundoi Meta.
