Ka reaguar për mbylljen dyjavore me Greqinë dhe Maqedoninë e Veriut caktuar si masë paraprake prej Komisionit Teknik të Ekspertëve për shkak të rritjes së të prekurëve me covid-19 në këto dy vende, kreu i LZHK-së Dashamir Shehi, duke e cilësuar këtë masë, si një masë që qeveria po e përdor për pengimin e emigrantëve. Në statusin e tij në Fejsbuk, Shehi e cilëson votën e emigrantëve dhe diasporës të sigurt për opozitën, ngase, nëse vendi do kishte qenë si në 3D-të e Ramës, ata do qenë kthyer të jetonin në vendin e tyre
Me një vendim absurd qeveria Rama ka bllokuar kufirin me Greqinë dhe Maqedoninë e Veriut, për të mos lejuar kthimin në atdhe të emigrantëve për të votuar me 25 prill, shkruan Shehi. Shumë prej atyre janë punëtor sezonalë, që jetojnë me familjet e tyre në Shqipëri, por shkojnë vetëm në periudha të caktuara për punë në bujqësi në Greqi ose Maqedoni. Vota emigrantëve dihet se anon nga opozita, pasi në 8 vite do të ishin rikthyer në atdhe, nëse Shqipëria do të ishte si në videot 3D të Edi Ramës. Keqqeverisja dhe varfëria ekstreme e arrirë nën sundimin e Edi Ramës, ka sjellë që qindra mijëra shqiptarë të largohen nga Shqipëria në 8 vitet e fundit. Qeveria e sotme e di mirë këtë fakt, ndaj ashtu si me skandalin e legalizimeve, po përdor çdo mjet për të penguar votën kundër saj, duke shkelur me dy këmbët ligjet e shtetit shqiptar, duke privuar shtetasit e saj nga një e drejtë e shenjtë si vota. Kjo përpjekje tjetër e ulët për të penguar emigrantët të kthehen për të votuar, nxjerr në dritë hipokrizinë e Rilindjes në lidhje me Votën e Diasporës.
