Ka dalë më në fund me deklaratën aq të shumëpritur kreu i qeverisë Edi Rama, i cili pas një vonese 1 orëshe në dhënien e saj, ka bërë me dije se, siç e la të nënkuptohej edhe gjatë intervistës në emisionin Zonë e Lirë mbrëmjen e djeshme, nuk do të ketë rritje çmimi për konsumatorin familjar dhe biznesin e vogël.
Plani ynë i kundërveprimit ndaj krizës energjitike, tha Rama në deklaratën e gjatë, përmes së cilës shpjegoi rritjen e çmimit të energjisë elektrike gjatë mandateve të tija qeverisëse, e po ashtu edhe (mos) rritjen e pensioneve, ka tre pika: E para, saktësoi Rama, garantimi dhe furnizimi me energji elektrike për të gjithë, vijon një numër masash të detajuara, e dyta, mbrojtja e familjeve dhe biznesit të vogël nga rritja e energjisë elektrike, vijon një numër masash të detajuara, e treta, garantimi i një fondi të detyrueshëm likuid, për ndërveprimin me tregun e energjisë elektrike, vijon garantimi i instrumentave të Garancisë Sovrane shtetërore, që do të jenë të ripërsëritshëm në vlerën 100 milionë euro për kompaninë e shpërndarjes së energjisë elektrike, në fund të këtij viti, dhe 100 milionë euro të tjera, në fillim të vitit tjetër, për të siguruar pikën një dhe pikën dy, përfundoi ai.
