Në takimin e sotëm me drejtorët e Policive në qarqe, në kuadër të reformimit të Policisë së Shtetit, kreu i qeverisë Rama e ka vënë theksin tek policët e korruptuar, që në këndvështrimin e tij, prishin imazhin e Policisë së Shtetit, duke i bërë kështu një shërbim tejet të keq jo vetëm asaj, por gjithë shqiptarëve e po ashtu edhe punës së qeverisë.
Dua ta nis këtë rënditje të problematikave nga raporti i policisë me qytetarët, që është A-ja dhe Zhja e jetës së përditshme të Policisë së Shtetit, tha Rama. Është e pajustifikueshme që rastet e mungesës së etikës në komunikim me qytetarët, sidomos nga ana e forcave Shqiponja dhe nga patrulla e përgjithshme, të cilat e kapërcejnë edhe vetë rolin e tyre, të shënohen si raste të rritura. Imazhi shumë pozitiv, i formuar dhe konsoliuar këto vite i policisë së shtetit, në sytë e qytetarëve, nuk mund në asnjë mënyrë të cënohet e aq më pak të lëndohet duke afektuar gjithë Policinë e Shtetit në optikën e opinionit publik. Dhe ky është edhe prioriteti i prioriteteve i gjithë drejtuesit e rinj të policive vendore, që shenjtërinë e uniformës dhe mbrojtejne imazhit të policisë së shtetit, duhet ta kenë dritë në syrin e tyre.
![](https://metropolpost.al/wp-content/uploads/2021/07/p1-1024x605.jpg)
Rama theksoi në fjalën e tij se qe e patolerueshme që pavarësisht forcës ndëshkuese ndaj policëve të korruptuar, e atyre rrugëorë për marrjen e rryshfeteve, puna e bërë në përmirësim të punës së Policisë së Shtetit të mos ndihej nga qytetari, dhe se policët e korruptuar duhej të dënoheshin penalisht për aktet e tyre korruptive.
Këtu dua të nënvizoj një fakt që në vetvete është shumë sfidues për ligjin, për shtetin, për Policinë e Shtetit. Kush janë këta pronarë lokalesh në zonën bregedetare, që në mënyrë të hapur shkelin ligjin, tejkalojnë kufirin e orës policore, krijojnë hapësirë abuzivizmi të atillë që degjeneron deri në krisma e plagosje, në mes të një dynjaje të tërë që është mbledhur aty në lokal? Kush janë këta? Ua them unë kush janë këta! Këta janë tutorët e Policisë së Shtetit në ato territore, këta janë korruptuesit e Policisë së Shtetit, këta janë abuzuesit më të mëdhenj me uniformën e Policisë së Shtetit, që tërheqin për hunde policë, shefa komisariatesh, duke i kthyer në roje të aktivitetit të tyre të paligjshëm. Rasti i Sarandës ishte një rast alarmant. Ai rast duhej të çonte në ndëshkimin penal të të gjithë zinxhirit të komandës në Sarandë. Jo në hetime administrative, masa oridinere, por në përjashtimin imediat dhe në ndëshkimin penal të personave përgjegjës. Kush e mban përgjegjësinë për nxjerrjen e armëve dhe sakatimin e njerëzve në lokal në 1 të natës, përveçëse ata që kanë lejuar që ai aktivitet të zhvillohet, në shkelje totale të ligjit, dhe jo në ndonjë luginë të humbur, por në mes të qytetit?
![](https://metropolpost.al/wp-content/uploads/2021/07/p2-1024x577.jpg)
Rama gjithashtu i ftoi policët ruanin etikën në komunikim me qytetarët, duke bërë denjësisht detyrën e tyre, sidomos tani që është edhe periudhë turizmi.
Vetë struktura e Policisë së Shtetit dhe e SHÇSHBA-së, konstatojnë së në punën e komisariateve, rastet e denoncimeve të qytetarëve nuk trajtohen me përgjegjësinë e duhur dhe kohën e duhur. Për më tepër sot, kur ne jemi tanimë në sezon turistik, dhe numri i lartë i pushuesëve që hyjnë dhe dalin në vend është domethënës, të kemi në Policinë e Shtetit individë të pdenjë, që t’i shkojnë kundra detyrimit të të gjithëve bashkë, të çdo strukture të shtetit, për t’i pritur dhe sajdisur të gjithë pushuesit, sipas tradtës më të mirë shqiptare, dhe sipas standarteve më të mira të një vendi, që pretendon të bëhet kampion i turizmit në Ballkan, tha midis të tjerave Rama.