Në lidhjen direkte nga faqja e vet, kreu i qeverisë Rama u tërhoqi vëmendjen edhe Bashkive sa u takon plazheve publike. Sipas tij, edhe pse caktimi i tyre është një farë përparimi, sërish nuk është bërë aq sa duhet, sepse njerëzit që të shkojnë aty duan kushte, dhe Bashkitë duhet të vendosin çadrat e shezllonët e tyre.
“Kemi vendosur plazhet publike”, u shpreh Rama, “jemi më mirë se më parë, por nuk jemi dhe aq mirë sa duhet, se nga njëra anë është bërë si lojë macja me miun, nga ana tjetër bashkitë nuk janë angazhuar në mënyrë të plotë për të vendosur çadrat e shezllonët e tyre. Plazhi publik, nuk mund të jetë thjesht një plazh bosh, dakord, t’i e lë një pjesë bosh për ata që kanë nostalgji për peshqirin, por siç e shihni nuk ndodh, sepse plazhet publike nuk frekuentohen shumë, duhen përmirësuar kushtet.
Nga ana tjetër, për ata që e bëjnë këtë lojë si macja me miun, ndëshkimet duhet të jenë shumë të forta. Nuk mund të jetë që ne të paguajmë inspektorë, të paguajmë naftë për të shkuar e për të marrë masat, dhe pastaj sa kthejnë kurrizin forcat e ligjit, fillojnë gjërat nga e para.
Jo, do të jenë ndëshkimet aq të forta, sa të mos i shkojë më mendja njeriu, të fillojë nga e para”, tha mes të tjerave kreu i qeverisë Rama.
Në deklaratën e tij, Rama nuk bëri me dije nëse Bashkitë do t’ia ofronin publikut kundrejt ndonjë pagese këto plazhe publike me çadra e shezllonë, ndaj mbetet për t’u parë se si do të menaxhohen nga Bashkitë sezonet e ardhshme.
Ndërkaq, në Evropë, jo më larg se sa në Itali, shumica e plazheve publike jane pa shezlonë e çadra, e njerëzit, edhe të rinj që nuk e kanë njohur kohën e peshqirit në komunizëm, shtrihen po me peshqirë e me ç’të duan, aty ku mund të rrinë pa paguar asnjë kuotë financiare.
