Shtetet e Bashkuara kanë pezulluar ndihmën aktuale ushtarake për Ukrainën, një ndihmë e cila shkon në mbi një miliardë dollarë armatime e pajisje lufte. Kështu njofton agjencia Bloomberg, sipas burimeve të së cilës, ky pezullim do të zgjasë derisa presidenti Donald Trump të ketë qartësuar mirëbesimin e përkushtimit të Kievit për paqen.
Pezullimi do të prekë gjithë ndihmën ushtarake që nuk ndodhet aktualisht në Ukrainë, duke përfshirë armët tranzit dhe ato në zonat tranzit në Poloni, thekson agjencia Bloomberg, duke cituar një zyrtar të ministrisë së Mbrojtjes.
Pezullimi vjen pas përplasjes mes Trumpit dhe Volodymyr Zelensky-t dhe presidenti amerikan ka urdheruar shefin e Pentagonit Pete Hegseth të zbatojë urdhrin e tij.
Zëvendëspresidenti i SHBA JD Vance, u shpreh se ai ka besim që presidenti ukrainas Volodymyr Zelensky do të pajtohet për bisedimet e paqes me Rusinë, pas takimit të dështuar me Trump të premten. Në një intervistë për Fox Neës, Vance tha se presidenti ukrainas “ka treguar një refuzim të qartë për t’u përfshirë në procesin e paqes. Mendoj se Zelensky nuk ishte ende gati – tha ai – dhe se ende nuk është, por mendoj se herët a vonë do të mbërrijmë atje. Duhet ta bëjmë me se s’bën”.
Vance shtoi se Trump do të jetë gati për bisedime të reja me Zelensky-n, kur presidenti i Ukrainës të tregojë angazhimin e tij të vërtetë për zgjidhjen e konfliktit me Rusinë.
