Ka përfunduar në Riad takimi mes delegacioneve ruse dhe amerikane për marrëveshjet e paqes mes Ukrainës dhe Rusisë.
Nga sa bëjmë me dije mediat botërore, marrëveshja përfshin tre faza: armëpushimin, zgjedhjet në vend dhe marrëveshjen përfundimtare, faza këto që Ministri i Jashtëm rus Lavrov, i mohoi gjatë deklaratave të tij nga Riadi. “Unë nuk kam parë asnjë raport që Rusia dhe SHBA-ja supozohet se kanë rënë dakord për një plan zgjidhjeje me tre faza për Ukrainën gjatë negociatave” në Riad”, tha ai në një konferencë për shtyp, siç raportohet nga agjencitë ruse.
E teksa bisedimet për paqen Rusi-Ukrainë u zhvilluan pa praninë e përfaqësisë evropiane, Sekretari amerikan i Shtetit, Marco Rubio deklaroi se “Në një moment të caktuar, edhe Evropa do të jetë e pranishme në tryezën e paqes”.
Ndërkaq Zelensky kritikoi bisedimet midis zyrtarëve amerikanë dhe rusë në Arabinë Saudite, për një paqe të mundshme mes Ukrainës dhe SHBA-ve, duke i konsideruar ato si bisedime për luftën në Ukrainë, pa pjesëmarrjen e Kievit. “Po zhvillohen bisedime midis përfaqësuesve të Rusisë dhe përfaqësuesve të Shteteve të Bashkuara të Amerikës. Për Ukrainën, por pa Ukrainën,” u shpreh Zelensky gjatë një vizite zyrtare në Turqi.
Ndërkaq, në një intervistë tjetë për ARD-në gjermane, Zelenski u shpreh se SHBA po përpiqen ta kënaqin Putinin. “Problemi është se SHBA po thonë gjëra që Putinit i pëlqejnë vërtet”, deklaroi ai. “Mendoj se kjo është çështja. Pse duan ta kënaqin atë? Të takohen ballë për ballë dhe të arrijnë sukses të shpejtë. Por ajo që ata duan është vetëm një armëpushim dhe ky nuk është një sukses”, tha Zelenski duke përsëritur se Ukraina nuk do të heqë dorë ligjërisht nga territoret e saj apo të nënshkruajë ndonjë marrëveshje “vetëm për të marrë duartrokitje të forta”.
