Duket se një dritë jeshile është ndezur për fermerët nga kryetarja e Komisionit të Parlamentit Europian Ursula von der Layen, e cila gjatë fjalimit të saj mbajtur përpara Komisionit Europian deklaroi se kishte shumë forma përmes së cilave mund t’u vihej në ndihmë fermerëve, e njëra syresh janë edhe subvencionet publike.
“Ndërsa po mbahej Këshilli Evropian”, tha von der Layen gjatë fjalës së saj, “fermerë nga e gjithë Evropa dolën në rrugë. Shumë prej tyre ndihen të bllokuar. Fermerët janë të parët që i ndjejnë efektet e ndryshimeve klimatike. Thatësira dhe përmbytjet kanë shkatërruar të korrat e tyre dhe u kanë kërcënuar bagëtitë. Fermerët e ndjejnë ndikimin e luftës ruse. Inflacioni, rritja e kostos së energjisë dhe e plehërave kimike. Megjithatë, ata punojnë shumë çdo ditë për të prodhuar ushqimin cilësor që hamë. Për këtë mendoj se u detyrohemi atyre mirënjohje, mirënjohje dhe respekt. Është e vërtetë”, vijoi von der Layen, “problemet janë intensifikuar vitet e fundit. Fermerët tanë meritojnë të dëgjohen. E di që ata janë të shqetësuar për të ardhmen e bujqësisë dhe të ardhmen e tyre si fermerë, por ata gjithashtu e dinë se bujqësia duhet të kalojë në një model prodhimi më të qëndrueshëm, që fermat e tyre të mbeten fitimprurëse për vitet në vijim. Dhe ne duam të sigurojmë që fermerët të gëzojnë pozitën drejtuese në këtë proces. Kjo është arsyeja pse filluam dialogun strategjik për të ardhmen e bujqësisë në Bashkimin Evropian. Kemi ftuar një gamë të gjerë përfaqësuesish nga sektori i Bujqësisë, fermerët e rinj, komunitetet rurale, industria e farërave dhe plehrave, sektori i ushqimit, sektori i përpunimit, por edhe nga sektori financiar, sektori kooperativ bankar, grupet e konsumatorëve e të mjedisit dhe, sigurisht, edhe nga shkenca. Duhet të analizojmë së bashku situatën, të ndajmë idetë dhe mbi të gjitha të zhvillojmë skenarë për të ardhmen. Duhet të shkojmë përtej një debati të polarizuar dhe të ndërtojmë besim. Besimi është baza themelore për zgjidhje të zbatueshme. Rrezikojmë të gjtihë së bashku. Sistemi ynë evropian i prodhimit të ushqimit është unik. Produktet në supermarketet tona pasqyrojnë shumëllojshmërinë e kulturave e traditave tona. Europa ka ushqimin më të shëndetshëm e cilësor në botë, falë fermerëve tanë. Ata luajnë një rol qendror në këtë sistem, dhe natyrisht, ata duhet të paguhen me drejtësi për këtë. Është e vërtetë që ne i ofrojmë mbështetje të madhe këtij sektori. Politika jonë e përbashkët bujqësore, mbështetet masivisht nga buxheti i BE-së. Paraja është e rëndësishme – por nuk është gjithçka. Burimet e shëndetshme natyrore, janë gjithashtu çelësi për ruajtjen e rendimenteve të larta. Në veçanti, toka pjellore ka qenë gjithmonë shtylla kurrizore e jetesës së fermerëve tanë. Dhe ne e dimë që 60-70% e tokave në Evropë, tani janë në gjendje të keqe. Ne mund t’i ndryshojmë këto raporte. Dhe shumë fermerë po bëjnë pikërisht këtë. Por ne duhet të bëjmë më shumë. Mbrojtja e efektshme e natyrës duhet të ofrojë stimuj bujarë për ndërhyrje. Fermerët kanë nevojë për një biznes të vlefshëm, për masa për përmirësimin e natyrës – ndoshta ne nuk e kemi bërë këtë bindshëm. Kërkohet një nxitje e vërtetë që shkon përtej humbjes së thjeshtë të rendimentit. Subvencionet publike mund t’i ofrojnë ato stimuj, dhe për shembull etiketimi premium, në bashkëpunim me shitësit me pakicë dhe përpunuesit. Me fjalë të tjera, ruajtja e natyrës mund të jetë e suksesshme vetëm përmes një qasjeje nga poshtë-lart, e bazuar në nxitje. Sepse vetëm nëse fermerët tanë jetojnë nga toka e tyre, ata do të investojnë në të ardhmen. Dhe vetëm nëse arrijmë synimet tona klimatike dhe mjedisore së bashku, fermerët do të jenë në gjendje të vazhdojnë të sigurojnë jetesën. Fermerët e dinë mirë këtë. Dhe ne duhet të kemi më shumë besim tek ata. Më lejoni t’ju jap një shembull. Komisioni propozoi SUR, i cili është synimi i denjë për të reduktuar rreziqet e produkteve kimike për mbrojtjen e bimëve. Por propozimi SUR është bërë një simbol i polarizimit. Është refuzuar nga Parlamenti Evropian. Nuk ka progress më as në Këshill. Kështu që ne duhet të bëjmë diçka. Për këtë arsye unë do t’i propozoj Kolegjit tërheqjen e këtij propozimi. Por sigurisht, tema mbetet. Dhe për të ecur përpara, nevojitet më shumë dialog dhe një qasje tjetër. Dhe mbi këtë bazë, Komisioni mund të bëjë një propozim të ri, me përmbajtje shumë më të pjekur dhe me palët e interesuara së bashku”, tha von der Layen mes tw tjerave.
