Duket se bullizimi në tik-tok nuk ka qenë i vetmi siklet i Bedrie Lokës, 41 vjeçares nga Durrësi, e cila më datë 2 janar të 2024-s vendosi t’i japë fund jetës, duke pirë fotoksinë.
Nga sa bën me dije Policia e Shtetit, por edhe të afërmit e të ndjerës, drejt vendimit makabër ka dhënë një dorë edhe bashkëshorti i saj.
Xhemal Loka, bashkëshorti i të ndjerës, ndaluar aktualisht nga policia, rezulton i dënuar në Francë për trafik droge, prej nga qe arratisur ilegalisht për në Greqi. Nga sa raportohet prej gazetarëve të terrenit, në celularin e tij, të cilin ai ia kishte lënë të motrës, janë gjetur video dhe mesazhe kërcënuese drejtuar të shoqes. Po ashtu edhe fëmijët e çiftit, kanë deklaruar se i ati ushtronte dhunë ndaj të ëmës, duke e kërcënuar madje një herë edhe me thikë në sy të tyre.
Teksa Policia e Shtetit vazhdon ende hetimet, mbi se si ka qenë situata e se deri ku ka ndikuar bullizimi në Tik-tok e deri ku presioni i të shoqit, ngjarja ka ngjallur reagime të mëdha në opinionin publik, reagime të cilat kryesisht e vënë theksin tek fuqia vrasëse që zotërojnë rrjetet sociale.
Vëllezërit e të ndjerës deklarojnë ndërkaq se nuk ka qenë dhe aq Tik-Toku, por dhuna e të shoqit që e ka shpënë të ndjerën drejt vetëvrasje, duke kërkuar madje edhe zhvarrimin e saj, për ta kontrolluar për shenja dhune në trup, pasi janë të bindur, edhe pse policia nuk ka deklaruar gjë, që e afërmja e tyre ka pasur shenja dhune në trup.
Një mesazh ngushëllues vjen edhe prej Zajmina Vasjarit, me gjasa pronare e fasonerisë ku punonte e ndjera, e cila e cilëson Bedrie Lokën si një prej punëtoreve më të shkëlqyera të fasonerisë.
Pavarësisht zhurmës mediatike që po shoqëron rastin, priten edhe të tjera të dhëna, për zbardhjen e kësaj çështjeje.
Dekralartë e Policisë Vendore Durrës
Vihet në pranga bashkëshorti i 41 -vjeçares që humbi jetën 4 ditë më parë, si pasojë e konsumimit të fotoksinës. Nga hetimet e thelluara rezultoi se 45-vjeçari ka dhunuar psikologjikisht në mënyrë të vazhdueshme, bashkëshorten e tij. 45-vjeçari, kur ishte kthyer nga Greqia, e kishte kërcënuar për ta vrarë bashkëshorten, me mjet prerës thikë, në prezencë të njërit prej fëmijëve. Gjatë kontrollit të ushtruar në territorin e banesës së 45-vjeçarit, Policia gjeti dhe sekuestroi 1 armë zjarri automatik tip “Sharrs”, një krehër dhe një sasi municioni luftarak. Në vijim të veprimeve të thelluara hetimore të kryera në drejtimin e Prokurorisë së Juridiksionit të Përgjithshëm Durrës, për zbardhjen e shkakut të konsumimit të lëndës helmuese nga 41-vjeçarja B. L., e cila më pas humbi jetën, specialistët për Hetimin e Krimeve të Komisariatit të Policisë Durrës arrestuan shtetasin Xh. L., 45 vjeç, i cili përkohësisht jetonte në Greqi, për shkak të punës. Nga veprimet hetimore rezultoi se shtetasi Xh. L., 45 vjeç, kishte dhunuar psikologjikisht në mënyrë të vazhdueshme bashkëshorten e tij, shtetasen B. L. Gjithashtu, nga hetimet e thelluara rezultoi se më datë 27.12.2023, shtetasi Xh. L. e ka kërcënuar bashkëshorten me mjet prerës (thikë), për të vrarë, në prezencë të njërit prej fëmijëve. Për këtë rast, shtetasja B. L. nuk ka bërë kallëzim në Polici. Gjatë kontrollit të ushtruar në territorin e banesës së 45-vjeçarit, Policia gjeti dhe sekuestroi 1 armë zjarri automatik tip “Sharrs”, një krehër dhe një sasi municioni luftarak. Gjithashtu, specialistët për Hetimin e Krimeve kanë sekuestruar celularin e shtetasit XH. L., i cili e kishte fshehur atë, dhe nuk ka bashkëpunuar me Policinë. Ky celular, bashkë me celularin e shtetases B. L., janë dërguar për ekspertimin me qëllim gjetjen e provave për dokumentimin e rrethanave dhe shkakut të ngjarjes. Po në vijim të veprimeve të thelluara janë kryer një sërë veprimesh të tjera procedurale me qëllim dokumentimin e plotë të shkakut që detyroi shtetasen B. L., të konsumonte lëndë helmuese.
