E teksa Perëndimi ka lëshuar një urdhër-arresti ndaj presidenti rus Vladimir Putin për krimet e kryera gjatë luftës në Ukrainë, ky i fundit ka deklaruar se nëse vihej në zbatim plani i Kinës për Ukrainën, mund të arrihej paqja, por kjo do të ndodhte sipas Putinit “kur ata në Perëndim dhe në Kiev të jenë gati për të”
Deklaratën e fortë Putin e ka bërë pas takimit me presidentin kinez Xi Jiping, takim ky i ndodhur ditën e martë në Moskë.
Në një konferencë të përbashkët shtypi pas përfundimit të bisedimeve me Xi, Putin u shpreh se: “Shumë dispozita të planit të paqes kineze, mund të merren si bazë për zgjidhjen e konfliktit në Ukrainë, por kur Perëndimi dhe Kievi të jenë gati për të. Por Rusia nuk e ka parë ende një gatishmëri të tillë”.
Plani i Kinës, publikuar muajin e shkuar, nuk kërkon në mënyrë eksplicite që Rusia të largohet nga Ukraina. Duke renditur 12 pika, ai bën thirrje për bisedime paqeje dhe respektim të sovranitetit kombëtar, pa propozime specifike. Por Ukraina ka këmbëngulur ndërkaq që Rusia të tërhiqet nga territori i saj, si kusht për çdo bisedim, ndërkohë nuk ka asnjë shenjë nga Rusia, se ajo është e gatshme ta bëjë këtë.
Sekretari amerikan i Shtetit Antony Blinken tha të hënën se thirrja për armëpushim përpara se Rusia të tërhiqet, “do të mbështeste në mënyrë efektive ratifikimin e pushtimit rus”.
Nga sa raporton BBC, dyshja Putin-Xi diskutuan për shkëmbimet tregtare, energjitike dhe lidhjet politike midis dy kombeve, duke nënshkruar një sërë marrëveshjesh si:
a) një që detajonte planet për bashkëpunimin ekonomik dhe ato mbi thellimin e partneritetit Rusi-Kinë;
b) një për një tubacion të planifikuar në Siberi për dërgimin e gazit rus në Kinë përmes Mongolisë
c) Ranë dakord që lufta bërthamore “nuk duhet të fillojë kurrë”
d) Diskutuan shqetësimin e tyre për paktin e ri “Aukus” – një marrëveshje mbrojtjeje midis Australisë, Mbretërisë së Bashkuar dhe SHBA
e) Shprehën shqetësim për praninë në rritje të NATO-s në Azi për “çështjet ushtarake dhe të sigurisë”
Në Perëndim ndërkaq po shtohen zërat se Kina mund të sigurojë mbështetje ushtarake për Rusinë, ndërkohë që në një deklaratë e përbashkët lëshuar nga Kina dhe Rusia pas takimit midis dy liderëve, u tha se partneriteti i ngushtë midis dy vendeve nuk përbën një “aleancë ushtarako-politike”. Marrëdhëniet “nuk përbëjnë një bllok, nuk kanë natyrë konfrontuese dhe nuk janë të drejtuara kundër vendeve të treta”, saktësohej në këtë deklaratë.
Ndërkaq Putin përdori konferencën për shtyp për të akuzuar Perëndimin, për dërgimin e armëve me një “komponent bërthamor” dhe tha se Rusia do të “detyrohet të reagojë” nëse Mbretëria e Bashkuar dërgon predha me uranium të varfëruar në Ukrainë. .
Vizita e Xi Jiping në Rusi erdhi disa ditë pasi Gjykata Penale Ndërkombëtare lëshoi një urdhër arresti për Presidentin Putin për akuzat për krime lufte.
