Kryetarja e partisë Lëvizja Socialistë për Integrim, Monika Kryemadhi, ka bërë publike sot përpara nje grupi gazetarësh evazionin fiskal me rreth 180 milionë lekë, kryer prej rreth 24 kompanive, një pjesë në bashkëpunim me kompanitë e inceneratorëve, sidomos me atë të Tiranës, e një pjesë përmes punëve publike fituar prej kompanive të ndryshme pranë qeverisë.
Sipas shpjegimit të Kryemadhit, bazuar në librat e hyrje daljeve të këtyre kompanive, rezultojnë mospërputhje të qarta mes objektit që shitet e atij që blihet, duke vjelur kështu paranë publike përmes një rrjeti kompanish fantazmë, që kanë 1 ose 2 punëtorë, ose asnjë.
Kryemadhi tha se kjo ishte një skemë e pastēr kriminale invazioni fiskal, në krye të së cilës qëndron vetë kreu i qeverisë Rama dhe bashkëpunëtorë të tij.
Mes të tjerave ajo u shpreh se të tëra letrat LSI do t’ia kalonte SPAK-ut, duke pritur një hetim të më tejshëm edhe prej hetimit tatimor, i cili sipas saj e kishte nisur njëherë hetimin e këtyre kompanive, por qe ndaluar nga nivele të larta politike të mos e bënte.
