I ftuar në emisionin “Çim Peka live”, presidenti i vendit Ilir Meta u shpreh se nuk kishte kryer asnjë shkelje kushtetuese me firmosjen nga Stambolli të lirimit të Begajt nga pozicioni i kreut të forcave të armatosura, pretendim i ngritur në fakt nga lideri historik i PD-së, i cili, në deklaratën e tij me gazetarët e duke cituar Konventën Kushtuetuese Evropiane, u shpreh se firmosja e lirimit të Begaj nga Stambolli ishte nul, për shkak se jashtë territorit presidentit i humbasin kompetencat.
Në sqarimin e bërë, Meta u shpreh se nuk ishte bërë asnjë shkelje kushtetuese e se ai dokument ishte hartuar brenda të gjithave parametrave kushtetuese dhe firma e tij e kishte po njësoj vlerën, si në Tiranë si në Stamboll.
“Përse të rrezikoja procesin për nje gjë kaq të parendësishme?”, tha Meta. “Mos vënia e firmës sime mund të shpinte në raundin e 5 e ndoshta edhe në shpërndarjen e parlamentit e në zgjedhje të reja. Po përse, kur mund të zgjidhej?”
Meta tha institucionet përkatëse si Presidenca, Kryeministria, ministri i Peleshi etj., ishin konsultuar, dhe firmosja e lirimit të Begajt nga Stambolli kishte qenë një zgjidhje për të cilën kishin rënë dakord të gjithë.
Kujtojmë që pas firmosjes së lirimit të Bajram Begajt nga pozicioni i kreut të Forcave tê Armatosura, ky i fundit u zgjodh president i Shqipërisë me 78 vota dhe pa miratimin e opozites.
