Zbulohet më në fund misteri i vrasjes së 20 vjeçares britanike Caroline Crouch në Glyka Nera të Greqisë, një ngjarje që ka mbajtur në fakt pezull për më shumë se 1 muaj, opinionin publik në mbarë botën.
Rreth një muaj më parë, më 11 maj të 2021-it, 20 vjeçarja britanike Caroline Crouch gjendet e mbytur në shtëpinë e saj me foshënjën 11 muajshe pranë, ndërkohë që i shoqi, Babis Anagnostopoulos, një 33 vjeçar grek, deklaron se kishte qenë një bandë hajdutësh e përbërë prej tri personave që nuk flisnin greqisht, ajo që e kishte mbytur, për t’u marrë paratë që kishin në shtëpi, pasi i kishin lidhur atij sytë e lidhur pas shtratit, e pasi kishin mbytur qenin e shtëpisë.
Nisur prej deklaratave të tij, fillimisht policia greke u fokusua në grupet e krimit që u përafroheshin më tepër përshkrimeve të bashkëshortit të së resë, duke iu vënë pas tri të dyshuarëve, mes së cilëve edhe një shqiptari, që u përfol gjatë në mediet greke si autor i krimit, ndërkohë që ai vetë, shfaqej tejet i pikëlluar krah familjarëve të saj, me foshnjën e tyre në krah, duke u ngashëryer për humbjen dhe pamundësinë e të voglit për të njohur të ëmën.
Pas pesë javë kërkimesh, duke mos mbërritur asgjëkundi pavarësisht hetimeve të shumta, hetimi për vdekjen e të resë mori mbrëmë një drejtim të ri, duke zbuluar më në fund se çfarë kishte ndodhur natën e 11 majit dhe se përse 20 vjeçarja Caroline u gjend e mbytur me foshnjën pranë.
Sipas policisë greke, pranuar tashmë edhe nga vetë bashkëshorti i Carolinës, Babis Anagnostopoulos, kishte qenë pikërisht ai që e kishte mbytur të shoqen për vdekje, pas sherrit që kishin pasur dhe kërcënimit të saj se do ta linte bashkë me fëmijën.
“Atë natë u zumë herët, mësohet të ketë deklaruar ai në polici. Një moment, ajo vërviti fëmijën në shtrat dhe më tha të ikja nga shtëpia. Më shtyu e më goditi me shkelma. Kapa diçka, e mbyta me jastëk, dhe pastaj sajova ardhjen e hajdutëve”.
Sipas policisë greke, qe fitness tracker (ora e fitnesit) që e reja mbante në dorë, e cila kishte hedhur poshtë deklaratat e derimëtanishme të bashkëshortit, duke e detyruar më në fund të pranote krimin. Ajo tregonte se zemra e Karolinës kishte rreshtur së rrahuri shumë më parë se koha e treguar si e mësymjes së hajdutëve, e po ashtu edhe gjurmuesi në telefonin e vetë bashkëshortit, dëshmonte se ai kishte bërë ece-jake gjithë natën, pavarësisht se kishte deklaruar që kishte qenë i lidhur për tërë natën pas shtratit pas hajdutëve.
Çifti qe njohur katër vite më parë në ishullin e Alonissos, ku e reja qe zhvendosur me të ëmën dhe të atin qysh në moshën 8 vjeçare. Ata martuar më 2019-n dhe në qershor të 2020-s Carolina kishte sjellë në jetë birin e tyre, i cili këtë muaj ka festuar ose feston edhe 1 vjetorin e lindjes.