Kanë nisur të mblidhen pranë stadiumit Air Albania, delegatët demokratë të cilët, në Kuvendin e thirrur prej ish kreut historik të PD-së Sali Berisha, pritet të shkarkojnë liderin e saj aktual Lulëzim Bashën.
Teksa ky i fundit e ka caktuar Kuvendin e PD-së më datë 18 dhjetor, duke e cilësuar kuvendin e thirrur prej Berishes si të paligjshëm e jashtë statutor, duket se demokratët janë ndarë tashmë përfundimisht në dy kampe, të cilat janë përballë njëra-tjetrës.
Gjatë Foltoreve mbajtur nëpër të gjithë Shqipërinë, Berisha ka theksuar se me të rimarrë Partinë Demokratike, do punojë për t’i rikthyer asaj dinjitetin, e po ashtu edhe në vlerat konservatore, duke shpallur menjëherë non grata në Shqipëri edhe George Soros-in, që sipas Berishës, duke përdorur kreun aktual Lulëzim Basha, do të fusë kthetrat edhe në Partinë Demokratike.
Nuk është ende e qartë se përse duhet besuar sërish Berisha për një rilindje të Partisë Demokratike, kur edhe kreun aktual të sajin, të cilin po e lufton fort, pasi ai e përjashtoi nga grupi parlamentar i PD-së, pas shpalljes ‘non grata’ nga Departamenti Amerikan i Shtetit, e ka zgjedhur po vetë, duke ia bekuar të gjitha lëvizjet.
