Një studim i Qendrës Amerikane për Kontrollin dhe Parandalimin e Sëmundjeve (CDC) ka arritur së fundmi në përfundimin se pas vaksinimit, individi jo vetëm që është më i mbrojtur prej virusit covid-19, por nuk infekton më as të tjerët. Edhe pse mjekët e dyshonin prej kohësh, deri më tani nuk qe dëshmuar ende kjo gjë.
Studimi u krye mes 39 punonjësish shëndetësorë e të ndihmës së shpejtë, të cilët morën javë për javë tamponin në hundë për të kryer testin PCR, që prej mesit të dhjetorit e deri në mes të marsit. Kreu i CDC-së Rochelle Walensky pohoi se rezultatet qenë fantastike. Pas marrjes së dozës së parë rreziku i infeksionit pakësohej me 80% brenda dy javëve dhe deri në 90% pas marrjes së dozës së dytë. Rezultatet, tha Walenksy, dëshmuan se njerëzit e vaksinuar as nuk e transmetuan sëmundjen dhe as nuk u sëmurën.
Ndërkaq imunologu hollandez Ger Rijkers, pranë spitalit Elisabeth-TëeeSteden të Tilburgut, shprehet po kaq entuziast për mediat vendase. Deri më tani arsyetimi i përgjithshëm mbi vaksinimin, thotë ai, qe në pikëpamje egoiste, pra vaksinohem për të mbrojtur veten. Ndërkohë që ky studim dëshmon se vaksinimi mbron edhe të tjerët, pra tashmë përfton edhe një motiv altruist. Kërkimi, theksoi si, dëshmon qartë që qarkullimi i virusit pakësohet ndjeshëm prej vaksinimit. Rezultatet e studimit amerikan, e sjellin pasaportën e vaksinimit shumë më pranë, thotë Rijkers. Edhe pse kjo është diçka në diskutim e sipër, fakti që vaksinimi parandalon gjerësisht infektimin është një argument i rëndësishëm për t’u thënë. Kush vaksinohet, mund të shkojë lirshëm në kinema, restorant apo diskotekë.
Edhe pse rezultatet e studimit bazohen mbi efektin e vaksinave të ashtuquajtura mRNA, Pfizer dhe Moderna, imunologu hollandez pohon se pret të njëjtin përfundim edhe nga tipet e tjera të vaksinave. Vlen të shihet, thekson ai, nëse mbrojtja e vaksinave do jetë po e njëjta dhe vitin që vjen, sepse kjo efektshmëri është matur vetëm gjatë një periudhe të shkurtër mes marrjes së dozës së parë e dozës së dytë.
Nuk është e qartë ende nëse Qendra Amerikave për Kontrollin dhe Paranmdalimin e Sëmundjeve do sugjerojë nisur prej këtij studimi heqjen e maskave për të vaksinuarit në Amerikë. Ajo që dihet deri më tani sipas mediave vendase, është që deri më tani, në Shtetet e Bashkuara janë vaksinuar me Pfizer e Moderna rreth 142 milionë njerëz.
